Вазорати меҳнати Русия пешниҳод кард, ки квотаи муҳоҷирон дар соли 2022 наздик ба 124 ҳазор нафар муқаррар карда, шумораи муҳоҷирони ҷалбшударо нисбат ба соли 2019 14% кам кунанд.

Бино ба иттилои ТАСС, Вазорати меҳнат ва ҳифзи иҷтимоии Русия пешниҳод кард, ки квота барои ҷалби муҳоҷирони корӣ, ки ба Русия бар асоси раводид меоянд, дар соли 2022 ҳудуди 124 ҳазор нафар муқаррар карда шавад.

Гуфта мешавад, дар соли 2019 квотаҳо барои ҷалби коргарони хориҷӣ 144,5 ҳазор нафарро ташкил дода, нисбат ба давраи пеш аз пандемия шумораи онҳо беш аз 14% кам шудааст. “Ин талабот дар соли 2022 бар асоси пешниҳоди мақомоти федералӣ ва минтақавӣ муайян шуда, аз ҷониби комиссияи байниидоравӣ, ки ба ҳайати он намояндагони Вазорати корҳои дохилии Русия, Вазорати саноат ва савдо, Вазорати кишоварзӣ, Вазорати рушди иқтисодии Русия, Вазорати сохтмон ва Вазорати рушди шарқии Русия шомиланд, тасдиқ шудааст,” – омадааст дар ин изҳорот.

Қайд карда мешавад, ки лоиҳа бо назардошти талаботи бозори меҳнати дохилӣ тартиб дода шудааст. Инчунин қарор дар бораи ба кор қабул кардани муҳоҷирони меҳнатӣ мутобиқи квота дар ҳоле сурат мегирад, ки агар дар дохили кишвар мутахассис пайдо карда нашавад.

Ин ҳам дар ҳолест, ки раиси Федератсияи муҳоҷирони Русия, Вадим Коженов пешниҳоди як тоҷири русро дар бораи коҳиш додани квота барои коргарони хориҷӣ интиқод карда буд.

Пештар раиси ширкати “Мираторг”, Виктор Линник дар як мусоҳиба бо шабакаи телевизионии РБК-и русӣ аз зиёд шудани муҳоҷирони корӣ дар Русия ва маъоши пасти шаҳрвандони рус изҳори нигаронӣ карда гуфт, барои коҳиш додани муҳоҷирони меҳнатӣ квота се-чор маротиба кам карда шавад.

“Вақте, ки мо муҳоҷиронро ба кишвар ворид мекунем, мо барои худи шаҳрвандони рус рақобати беадолатона эҷод мекунем”,- гуфт Линник.

Вазорати корҳои дохилии Русия рӯйхати 59 минтақаеро омода ва пешниҳод кардааст, ки аз 29 декабр муҳоҷирон метавонанд, раванди ангушнигорӣ ва аксбардории ҳатмиро оғоз кунанд.

Бино ба иттилои Портали федералии санадҳои меъёрӣ ва ҳуқуқии Русия, ки рӯзи 21-уми октябр нашр шуд, омадааст, ки рӯйхати минтақаҳо бо дарназардошти филиалҳои Хадамоти шиносномадиҳӣ ва раводиди назди Вазорати корҳои дохилии Русия муайян ва раванди бақайдгириро иҷро менамояд.

Вазорати корҳои дохилии Русия ҳангоми бақайдгирии ҳатмии давлатӣ супоридани изи ангуштони шаҳрвандони хориҷӣ ва шахсони бешаҳрвандӣ, аксбардории онҳо, инчунин қабулу фиристодани санадҳои тиббиро ба мақомоти ҳудудии ВКД- Русия муҳим дониста, гузариши муоинаи тиббии шаҳрвандони хориҷӣ ва шахсони бешаҳрвандиро тасдиқ мекунад “, – омадааст дар санад.

Дар ин санади Вазорати умури дохилаи Русия феҳристи 59 минтақа қайд гардидааст ва барномарезӣ шуда, ки ин лоиҳа аз 29 декабр эътибор ва ба ҳукми иҷро дарояд.

Гуфта мешавад, муҳоҷирони меҳнатӣ ва дигар категорияҳои хориҷиёне, ки зиёда аз 90 рӯз ба Русия сафар мекунанд, аз 29 декабри соли 2021 онҳо ба супоридани изи ангушт ва аксбардории ҳатмӣ фаро хонда мешаванд.

Гуфтанист пас аз анҷонми ин раванд ба муҳоҷирони корӣ кортҳои пластикие, ки дорои интиқолдиҳандаи маълумоти электронӣ ҳастанданд, таҳвил дода шуда, назорат аз болои муҳоҷирон пурзӯр карда мешавад.