Эмомалӣ Раҳмон рӯзи 28 август  ба истиқболи 29 – солагии Истиқлоли  Ҷумҳурии Тоҷикистон ба 70 нафар намояндагони касбу кори гуногун,  мукофотҳо, унвону ҷоизаҳои давлатӣ тақдим намуд. Дар ин бора хабаргузории давлатии “Ховар” хабар медиҳад.

Дар ин маросими мукофотсупорӣ ба Маҳмадсаид Убайдуллоев, собиқ шаҳрдори Душанбе ва собиқ Раиси Маҷлиси миллии Маҷлиси Олии Тоҷикистон ордени “Ситораи Президенти Тоҷикистон” дараҷаи I тақдим карда шуд. Убайдуллоев аз чеҳраоест, ки аз сари қудрат омадани Э.Раҳмон дар мансабҳои калидии кишвар фаъолият намудааст. Ӯ аз соли 1996 то соли 2017 шаҳрдори Душанбе буд ва аз соли 2000 то соли 2020 раёсати Маҷлиси миллии Маҷлиси Олии Тоҷикистонро бар ӯҳда дошт.

Эмомалӣ Раҳмон ҳамчунин имрӯз ба Рустами Ваҳҳоб ва Алимуҳаммад Муродӣ унвони “Шори халқии Тоҷикистон” ва ба устодони Донишгоҳи миллли Тоҷикистон медали “Хизмати шоиста” тақдим кард.

Ба иттилои хадамоти матбуотии Президенти Ҷумуҳри Товикистон 1 нафар унвони фахрии “Нависандаи халқии Тоҷикистон”, 3 нафар унвони фахрии “Шоири халқии Тоҷикистон”, 1 нафар унвони фахрии “Ҳунарманди халқии Тоҷикистон”, 1 нафар унвони фахрии “Ҳунарпешаи шоистаи Тоҷикистон”, 2 нафар унвони фахрии “Корманди шоистаи Тоҷикистон”, 1 нафар бо ордени “Шараф” дараҷаи II, 36 нафар бо медали “Хизмати шоиста” ва 3 нафар бо “Ифтихорномаи Ҷумҳурии Тоҷикистон” сарфароз гардиданд.

Ин дар ҳолест, ки Муҳаммадсаид Убайдуллоев моҳи апрели соли равон аз Раиси Маҷлиси миллии Маҷлиси Олии Тоҷикистон барканор гардид ва ба ҷояш Рустами Эмомалии 32-сола писари бузурги Президент интихоб гардид.

Имрӯз хабарҳои: Қасди куштори ҷавон дар Душанбе, фиребгарии сокинони Ваҳдат ва Ҳисор, дуздии ноболиғ дар Турсунзода ва ғ. дар сархати хабарҳои ВКД-и Тоҷикистон қарор дошт.

Қасди куштори ҷавон дар Душанбе

Вазорати корҳои дохилии Ҷумҳури Тоҷикистон хабар дод, ки дар таърихи 11 августи соли равон тахминан соатҳои 11:30 дақиқа марди 27-солаи сокини ҷамоати деҳоти Чортеппаи ноҳияи Рӯдакӣ, ҷавони 22-солаи сокини ҷамоати деҳоти Чимтеппаи ҳамин ноҳияро, дар кӯчаи Муҳаммадиеви пойтахт дар  хонаи иҷоравиаш аз сабаби муноқишаи ба миён омада, бо банд гулӯяшро бӯғӣ карда, мехост ӯро ба ҳалокат расонад. Аз рӯи ин ҳодиса тафтишот идома дорад.

Фиребгарӣ

Марди 54 солаи сокини пойтахт ба ШВКД-1 дар ноҳияи Фирдавсӣ бо ариза муроҷиат намудааст, ки сокини 38  шаҳри Ваҳдаӣ, ки қаблан бо моддаи 247 қисми 4  Кодекси ҷиноятии Ҷумҳури Тоҷикистон суд шудааст, сани 22 октябри соли 2018 дар назди бозори Султони Кабир бо роҳи фиреб ба бовари ин мард даромада аз ӯ 152 ҳазору 145 сомонӣ гирифта то ҳол барнагардонида аст.

Мошинҳоро фурӯхт маблағро наовард

Аз ҷониби  кормандони милитсия ҷавони 26-солаи сокини шаҳри Душанбе ҳамчун гумонбар дар содир намудани кирдори қаллобӣ дастгир карда шудааст, ки ӯ аз як сокини 26-солаи шаҳри Ҳисор бо роҳи фиреб 4-адад автомашинаи тамғаҳои “Лексус-470”, “Лексус-460” ва “Хундай Соната”-ро гирифта ба маблағи 42 ҳазор доллари амрикоӣ фурӯхта, маблағашро  барнагардонидааст. Ба ҷабрдида ваъда додааст, ки дар ҷамоати деҳоти Чоргултеппа бӯстонсаройро ба номаш ҳуҷҷатгузорӣ  мекунад. ВКД гуфт, вобаста ба ин қазия тафтишот идома дорад.

Дуздии ноболиғ дар Турсунзода

Санаи 17 авгусим соли равон ҷавони 15 сола дар бозори марказии шаҳри Турсунзода тахминан соатҳои 11, телефони мобилии тамғаи «Самсунг-Нот-8»-и   марди 31-солаи сокини шаҳри Ҳисорро, ки  арзишаш 6 ҳазору 200-сомониро ташкил медиҳад, дуздида аз ҷойи ҳодиса ғайб задааст.   Аз  ҷониби кормандони милитсия   сокини шаҳри мазкур бо гумони содир намудани ҷинояти дуздӣ дастгир карда шудааст.

Сокини 35 солаи шаҳри Душанбе Аҳмад Караевро барои беэҳтироми нисбати модарараш бо қарори  додгоҳ   10 рӯз  ба ҳабс гирифтаанд. Дар ин бора Маркази матбуоти Раёсати ВКД дар шаҳри Душанбе хабар медиҳад.

Раёсати умури дохилии шаҳри Душанбе  гуфтааст,  Қараев дар ҳолати мастӣ    дар назди ҳамсоягон бо модараш муноқиша намуда бо садои баланд дашному ҳақоратҳои  қабеҳ кардааст.

Ҳамчунин дар сомонаи расмии Раёсати умури дохилии шаҳри Душанбе   гуфта шудааст, ин ҷавон бо ин амали худ, шаъну шарафи модар ва тартиботи ҷамъиятиро вайрон карда оромии сокинонро халалдор намудааст.

Нисбати  Қараев Аҳмад бо моддаи 460 парвандаи маъмурӣ (майдаавбошӣ)  тартиб дода шуда, бо қарори додгоҳ ба муҳлати 10 шабонарӯз  ба ҳабс  гирифта шудааст.

Раёсати умиури дохилии шаҳри Душанбе  гуфтааст: “Нисбати афроде, ки ба волидайни худ беэҳтиромӣ зоҳир намуда онҳоро мавриди озор қарор медиҳанд, тибқи қонунгузорӣ ҷазо пешбинӣ шудааст”.

Суди ноҳияи Файзобод Шобидин Табаровро барои вайрон намудани қонун «Дар бораи танзими анъана ва ҷашну маросимҳо» ба ҷавобгарии ҳуқуқвайронкунӣ кашидааст. Дар ин бора раиси суди ноҳия Бахтиёр Холиқзода ба  “Ховар” хабар дод.

Ба навиштаи “Ховар” Шобиддин Табаровро, ки сокини деҳаи Арзановаи ҷамоати деҳоти “Ҷавонон”-и  ноҳия Файзобод мебошад, барои гузаронидани маъракаи  «сол»-и  модари марҳумаш бо додани таом бо моддаи 481-и  Кодекси ҳуқуқвайронкунии маъмурии Ҷумҳурии Тоҷикистон гунаҳкор дониста,  бо дастрасии  моддаи 48,  қисми 5-и Кодекси ҳуқуқвайронкунӣ ба андозаи панҷоҳ нишондиҳанда, баробар ба ду ҳазору нуҳсад сомонӣ ҷарима таъйин шудааст.

Ҳолатҳои ҷарима бастани шаҳрвандони оддӣ барои вайрон намудани қонуни танзими анъана бисёр аст. Як манбаъ дар суҳбат бо “Аздо тв” гуфт, бештарин ҳолатҳои вайрон намудани қонуни танзим ба хешу табор ва наздикони мансабдорон рост меояд. Вале ҳолати ба ҷавобгари кашидани мансабдорон ангуштшумор аст. Соли 2017 Сайфиддин Назарзода, раиси собиқи Китобхонаи миллии Тоҷикистон барои вайрон намудани қонуни танзим ба маблағи 12000 сомонӣ ҷарима шуда буд. Аммо худи Назарзода гуфта буд аз ҳукми додгоҳ розӣ нест ва ба назари ӯ, дар системаи судӣ нуқсҳои хеле ҷиддӣ нуҳуфтааст. Он замон Сайфиддин Назарзода маъмурони Оҷонсии зиддифасодро, ки туйи писари ӯро наворбардорӣ кардаанд ба дахолат ба зиндагии шахсии шаҳрвандон муттаҳам кард. Ва кори кормандони Оҷонсии зиддифасодро фармоишӣ хонда буд.

Ба назари коршиносон бо қабули қонун «Дар бораи танзими анъана ва ҷашну маросимҳо дар Ҷумҳурии Тоҷикистон» ҳолатҳои коррупсионӣ баръакс бештар шудааст.

Саломати Баҳром Иноятзода, раиси пешини Кӯлоб дар боздоштгоҳ бад шудааст. Наздикони ӯ гуфтаанд,ки баъди аз беморхона ба СИЗО мунтақил шудани ӯ вазъи сиҳҳатиаш дубора вазнин шудааст.

Аммо манобеъ дар мақомот гуфтаанд, ки бо далели беҳ шудани вазъи саломатиаш ӯро дубора ба СИЗО ё тавқифгоҳи муваққатӣ бурданд. Муҳаббат Иззатова, хоҳари Баҳром Иноятзода, рӯзи 25-уми август дар суҳбат бо Радиои Озодӣ гуфтааст, “пас аз табобат ёфтан аз коронавирус, хуни бародарам ғафс шудааст, пойҳояш варам кардаанд ва дилаш дард мекунад”.Вай иддао кард, ба пизишконе, ки бародарашро қаблан табобат мекарданд, иҷозаи вуруд ба боздоштгоҳро надодаанд:

“Ба ягон нафар аз наздикон ҳам иҷозаи вохӯрӣ надоданд. Вазъияташ дубора нохуб шуд. Худашон як духтурро бурдаанд ва мо то ҳол намедонем, саломатиаш беҳтар шудааст, ё не. На писар ва на ҳамсарашро ба назди ӯ роҳ надоданд”, – мегӯяд Муҳаббат Иззатова, хоҳари Баҳром Иноятзода.

Хабари бемории раиси пешини Кулоб дар ҳоле аст ки шоеъоте дар мавриди даст ба гуруснашинӣ задани ӯ ҳам дар шабакаҳои маҷозӣ давр мезанад. Як манбаи Радиои Озодӣ низ дар мақомоти интизомӣ гуфтааст, “ҳафтаи гузашта Баҳром Иноятзода се рӯз гуруснанишинӣ кард”. Манбаъ мегӯяд, раиси собиқи Кӯлоб ба ин васила хостааст, баъзе иттиҳомот аз парвандааш берун ва худаш бо табобати дуруст фаро гирифта шавад. Муҳаббат Иззатова, хоҳари Баҳром Иноятзода, гуфтааст аз гуруснашинии бародараш хабар надорад, вале тасдиқ кард, ки ӯ се рӯз аз гирифтани хӯроки бурдаи наздикон даст кашидааст.

Хусрав Аюбӣ, вакили мудофеи Баҳром Инотязода дар суҳбати кӯтоҳ гуфт, рӯзи 25-уми август бо нафари таҳти ҳимояташ вохӯрд ва ӯ аз саломатиаш шикоят надошт. Вакили мудофеъ тафсилот надод ва гуфт, ҳаққи суҳбат дар бораи парвандаро надорад, чун ба мақомот дар бораи фош накардани ҷузъиёт забонхат додааст.Иноятзода 8-уми июни имсол бо иттиҳоми гирифтани “пора” боздошт шуд. Ӯро пас аз мубтало шудан ба коронавирус дар шифохонаи сироятии шаҳри Кӯлоб бистарӣ карда буданд. Ба гуфтаи додситон, нисбат ба Баҳром Иноятзода бо қисми 4-и моддаи 319-и Кодекси ҷиноӣ ё гирифтани ришва дар ҳаҷми калон ва аз ҷониби роҳбари мақомоти маҳаллӣ парванда кушода шудааст. Дар сурати тасдиқи ин иттиҳом ба Иноятзода то 12 соли зиндон таҳдид мекунад.

Баҳром Иноятзода дар гузашта раиси шаҳри Истаравшан ва вакили Маҷлиси миллӣ буд ва моҳи майи соли гузашта раиси шаҳри Кӯлоб таъйин шуд. Номи ӯ дар моҳи феврали соли равон, замоне пурсарусадо шуд, ки моликони ширкати “Комил-2010”, мансуб ба писари Бег Сабур, раиси Хадамоти алоқа ва қудои президенти Тоҷикистонро танқид кард.

Бархе аз коршиносон муътақиданд,ки иллати асосии ба маҳкама кашидани раиси пешини Кулоб ҳамин фошкориҳои ӯ нисбати қудои президент ва интиқомкашии вай аст.Ва,агарки мегӯянд онҳо ин парванда “заказной” ё фармоишӣ набуд,бо барканорӣ аз мақом қаноат мекарданд.Ва,дигар ҳам ин аст ки бо ришва то ҳамин акнун касе дар сатҳи раиси як шаҳр ва ё ноҳия ба маҳкама кашида нашудааст.