Эмомалӣ Раҳмон имрӯз 20 август зимни вохӯрӣ бо сокинони ноҳияи Ванҷ ба масъалаи сулҳу субот ва роҳҳои таъмини он дар кишвар ишора намуда, гуфт, ки танҳо аз соли 2014 то имрӯз 53 нафар сокинони ноҳия дар ҳайати ташкилоту гурӯҳҳои байналмилалии террористиву экстремистӣ дар муқовиматҳои мусаллаҳона дар қаламрави дигар давлатҳо иштирок доранд.

Ба гуфтаи президенти кишвар аз ин адад 50 нафар мард ва 3 каси дигар зан мебошанд, ки нисбат ба ҳамаи онҳо аз ҷониби мақомоти ҳифзи ҳуқуқ парвандаҳои ҷиноятӣ оғоз гардида, дар кофтукови байламиллалӣ қарор доранд.

Президент дар давоми суҳбаташ афзуд, ки 20 нафарашон сокинони деҳоти Язгулом, 13 нафар аз деҳоти Рованд, 11 нафар сокинони деҳоти М. Абдуллоев ва 7 нафар аз деҳоти Техарв мебошанд.

“То имрӯз 12 нафари онҳо дастгир ва ба Ватан баргардонида шуда, нисбат ба 8 нафар парвандаҳои ҷиноятӣ барои баррасӣ ба суд ирсол гардидааст”, – гуфт Раҳмон дар суҳбаташ.

Ӯ сохторҳои қудратии ноҳия ва ҷумҳуриро вазифадор намуд, ки кори фаҳмондадиҳиро дар байни аҳолӣ ҷоннок кунанд.

Ҳамзамон Эмомалӣ Раҳмон ишора намуд, ки 96 нафар сокинони ноҳия дар солҳои 1992-2015 дар муассисаҳои таълими динии хориҷӣ ғайрирасмӣ таҳсил доштанд, ки 92 нафари онҳо ба Ватан баргардонида шуда, 4 нафари дигар то ҳанӯз дар шаҳри Қоҳираи давлати Миср ба таври ғайрирасмӣ таҳсили динӣ гирифта истодаанд.

Ҳафтаи гузашта дар шабакаҳои иҷтимоӣ наворе нашр шуд, ки дида мешуд тақрибан 100 нафар назди бинои ҳукумати Ванҷ ҷамъ омада буданд. Ба гуфтаи шоҳидон, сабаби ин таҷаммуъ барои изҳори нигаронӣ аз амалкарди ноҷо ва риштарошӣ маҷбурии гурӯҳи кории ҳукумати маҳаллӣ будааст, ки пешопеши сафари Эмомалӣ Раҳмон ба ин ноҳия мақомот рӯи даст гирифтанд.

Ба назари коршиносон маҳз дар ҳамин мавзӯъ суҳбат кардани Раҳмон дар ин ноҳия ва дастуру супоришҳо додан ба мақомот, ки кори фаҳмондадиҳиро ҷоннок кунанд, ба наздик шудани интихоботи президентӣ дар Тоҷикистон ва инчунин вазъияти сиёсии минтақа, хусусан эътирозҳои оммавии Белорус рабт дорад. Ба назари онҳо ин суҳбатҳо ба маънои лаҷоми мардуми ҳақталаби ин ноҳияро кашидан аст. Ҳамчуноне, ки дар минтақаҳои дигари кишвар ин амал татбиқ шуда буд.

Як манбаъ ба “Аздо тв” аз ноҳияи Ванҷ хабар дод, ки як ҳафта боз мақомот барои сафари Раҳмон маъракаи риштароширо пеш гирифтааст, аз ин рӯ, мардум бо мақомот зиёд даргир мешаванд. Манбаъ мегӯяд, ки ду рӯз пеш аз расидани Президент ба ин ноҳия тадбирҳои амниятӣ сахттар шуда ҳатто аз дигар навоҳӣ нерӯҳои низомиро ба Ванҷ овардаанд. Ба гуфтаи ӯ имрӯз дар кучаву роҳҳои ноҳия нерӯҳои амниятӣ зиёд ба чашм мехӯранд.

Сомонаи Вазорати корҳои дохилии Тоҷикистон хабар дод, ки рӯзи 19-уми августи соли равон як сокини ноҳияи Вахш бо се халтаи бо скоч печонидашудаи шираи камол дар ҳаҷми 160 килограмм дар ҳудуди ноҳияи Шаҳритус дастгир шуд.

“Рӯзи 19-уми августи соли 2020 тахминан соатҳои 21:10-дақиқа, дар дидбонгоҳи доимоамалкунандаи БДА-и Кофарниҳон, воқеъ дар ҳудуди ноҳияи Шаҳритус автомашинаи тамғаи “Мерседес-Бенс”, ки ба марди 39-солаи сокини ҷамоати деҳоти Истиқлоли ноҳияи мазкур тааллуқ дорад бо гумони ғайриқонунӣ нигоҳ доштани шираи камол дастгир карда шуд”,- омадааст дар хабари ВКД Тоҷикистон.

Дар Тоҷикистон ин гиёҳ танҳо аз сӯи ширкати “Фароз”, ки ба домоди раисҷумҳур тааллуқ дорад ҷамъоварӣ мешавад, аммо ҷамъовардани он аз тарафи шаҳрвандони оддӣ ҷиноят маҳсуб буда, то кунун чандин нафар бо ин ҷурм аз ҷониби мақомот дастгир шудааст. Онҳое, ки дастгир мешаванд бар зиддашон бо моддаи 77-78-и Қонуни ҳифзи муҳити зисти Ҷумҳурии Тоҷикистон парванда боз мешавад.

Оҷонси мубориза бо коррупсияи Тоҷикистон аз боздошти ду сарҳанги Кумитаи давлатии амнияти миллӣ хабар медиҳад.

Хабаргузории “Avesta.Tj” бо такя ба манобеи Оҷонсӣ менависад сардори Раёсати тандурустии нерӯҳои марзбонии КДАМ сарҳанг Азизов Ҷиёнхон Зайдуллоевич ва муовини командири қисми ҳарбии нерӯҳои марзбони амният дар ноҳияи Панҷ сарҳанг Усмонзода Мирзодавлат Абдуғаффор дар гирифтани ришва муттаҳам мешаванд.

Тибқи хабари маркази матбуоти Оҷонсӣ рӯзи 30 июли соли ҷорӣ шаҳрванд Умарова ба онҳо муроҷиат кардааст, ки дар нисбати сарҳанг Азизов Ҷиёнхон ва сарҳанг Усмонзода Мирзодавлат Абдуғаффор чораҳои қонунӣ татбиқ кунанд.Қайд карда мешавад, ки М.Усмонзода барои озод кардан аз идомаи хидмати сарбозӣ бо сабаби беморӣ аз хеши аризадиҳанда шаҳрванд Т.Маазамова маблағи калон талаб карда дар ду ҳолат дар маҷмӯъ 15000 сомонӣ гирифтааст. Чиёнхон Азизов, низ аз ҷабрдида пул талаб карда ва дар ду маврид 17 ҳазор сомонӣ гирифта ва боз 8 ҳазори дигар талаб кардааст ва ба ҳангоми гирифтани ин қисмати малағ аз тарафи кормандони Оҷонсӣ боздошт шудааст. Аз рӯи ин ҳодиса нисбати Чиёнхон Азизов ва Мирзодавлат Усмонзода  парвандаи ҷиноятӣ бар асоси моддаи 319 Кодекси ҷиноятии Тоҷикистон (гирифтани пора) боз шудааст.

Дар рафти тафтишоти муқаддамотӣ муайян карда шудааст,ки барои озод кардан аз идомаи хидмати аскарии  Т.Маазамова бо сабаби беморӣ Азизов ва Усмонзода,бо истифода аз мақоми хидматӣ дар маҷмуъ ба маблағи 40.000 сомонӣ пора гирифтаанд

Ёдовар мешавем, ки чанд рӯз пештар КДАМ полковник Маҳмадзода Ҷонибек, мутахассиси пешбари Раёсати нозири субъектҳои хоҷагидорӣ, сармоягузорӣ ва қарзи Оҷонси мубориза бо фасодро бо иттиҳоми гирифтани ришват дастгир карда буд. Гуфта мешавад, ки сарҳанг Ҷонибек Махмадзода аз тарафи ходимони Кумитаи амният дар айни содир кардани ҷиноят ва бо маблағи калони пора дастгир шудааст. Дар нисбати Маҳмадзода Ҷонибек кори ҷиноятӣ оғоз шудааст ва тафтишоти муқаддамотӣ идома дорад хабар медиҳад Маркази робита бо ҷомеаи КДАМ-и Тоҷикистон.

Ҷанги миёни Оҷонсии зидди коррупсия ва КДАМ бори аввал нест. Солҳои гузашта ҳам мавориди боздошти кормандони баландпояи ду ниҳод аз тарафи муқобил сурат гирифтааст. Соли 2017 КДАМ беш аз 10 масъули баландмақоми Оҷонсиро боздошт карда буд, ки дар миёни онҳо генералҳои ин ниҳод низ ҳузур доштанд.Онҳо бо гирифтани пора муттаҳам мешуданд.

Барои оғози бунёди беъзе иншоот Эмомалӣ Раҳмон ба Вилояти Мухтори Кӯҳистони Бадахшони сафар кард. Дар ин бора «Ховар» хабаргузории расмии Тоҷикистон хабар дод.

Раҳмон сафари кории худро аз ноҳия Дарвози ин вилоят оғоз намуда дар деҳаи Вишхарви ноҳияи мазкур корхонаи «Карон-калсит»-ро мавриди баҳрабардорӣ қарор додааст.

«Карон-калсит» имконият дорад, ки дар як сол 100 ҳазор тонна маҳсулот истеҳсол намояд. Корхона дар асоси ашёи хоми маҳаллӣ фаъолият намуда, он дар назди захираи бузурги санги мармари сафед, ки микрокалсит аз ин навъи санг омода мегардад, бунёд ёфтааст, навиштааст “Ховар”.

Ин коргоҳ 40 нафар аз мардуми маҳаллиро бо ҷойи кор таъмин кардааст.

Гуфта мешавад, ки микрокалсит дар саноат ба таври васеъ истифода гардида, барои истеҳсоли бештар аз 90 фоизи таҷҳизоту дастгоҳҳо, масолеҳи сохтмониву ашёи рӯзғор, техникаву технологияи гуногун ва маҳсулоти кимиёвӣ илова карда мешавад. Аз ҷумла, дару тирезаҳои пластикӣ, қубурҳои гуногунқутр, тамоми навъи чархи нақлиёт, масолеҳи ороишӣ ва рангу бори хона бо истифодаи микрокалсит истеҳсол мегардад.

Президент Раҳмон баъди шиносоӣ бо фаъолияти корхонаи «Карон -калсит» ба масуълон дастур додааст, ки дар давоми як сол боз ду коргоҳи истеҳсолӣ – саноатӣ бо фарогирии 200 ҷойи кор сохта ба истифода диҳанд.

Маълум нест,ки ин корхона бо маблағи бюҷет бунёд ёфтааст ва ё аз тарафи кадом соҳибкор.

Дар ҳар сурат то ҳамин имрӯз барои мардуми кишвар номаълум боқӣ мондааст,ки гузоштани санги аввали курсӣ аз сӯи Раҳмон ва ё ифтитоҳ ва мавриди баҳрабардорӣ қарор додани коргоҳ ё ягон маркази савдову майдончаи варзишӣ бо ширкати ӯ чи аҳамият дорад? Магар инки Раҳмон худро таблиғ ва ташвиқ кунад ва ин сафарро ҳам   дар доираи омодагиҳо ба интихобот мешавад маънидод кард. Аз ин ҷост ки пурсида мешавад Раҳмон ба маъракаи таблиғи интихоботӣ шурӯъ кардааст ва ё курсизанӣ рафтааст?