Боздошти як зани тоҷик бо гумони грифтани наздики 700 ҳазор сомнӣ

-

11/07/2023

Мақомоти дахлдори Тоҷикистону Қирғизистон ҳафтаи гузашта музокираи навбатии худро дар бораи таъйин ва аломатгузории марзи муштараки ду кишвар дар Қирғизистон гузарониданд.

Тавре Вазорати корҳои хориҷии Тоҷикистон рӯзи 10-уми июл хабар дод, вохӯрии гурӯҳҳои кории топографии ҳайатҳои ду кишвар як ҳафтаи комил, аз 3-юм то 9-уми июли соли 2023 идома пайдо кардааст.

Бино ба иттилои манбаъ, ин музокирот дар шаҳри Бодканди Қирғизистон баргузор шудааст. Ва тиқби нақша, қарор аст вохӯрии навбатии гурӯҳи корӣ дар Ҷумҳурии Тоҷикистон баргузор бишавад.

Маълум нест ҳайатҳои кории ду кишвар дақиқан ба чӣ тавофуқоте даст пайдо кардаанд. Вазорати корҳои хориҷаи Тоҷикистон танҳо гуфтааст, ки “Аз натиҷаи вохӯрӣ Протоколи дахлдор ба имзо расид.” Ва ба гуфтаи ин ниҳоди дипломатии тоҷик, “Вохӯрӣ дар фазои дӯстӣ ва ҳамдигарфаҳмӣ баргузор шуд.“

Ҷониби Тоҷикистон маълумоти дақиқ аз рафти музокиротро ифшо намекунад, дар вохӯриҳои гузашта низ мақомоти тоҷик таъкид мекарданд, ки “мулоқоти гурӯҳҳо дар фазои неки якдигарфаҳмӣ ба поён расида, барои таҳкими муносибатҳои ҳамсоядорӣ табдирҳои зарурӣ андешида шуд,” аммо ҳолатҳое низ шуда, ки пас аз чунин таъкидҳо боз кашмакашу даргириҳои хунин байни сокинони марзии ду кишвар сар задааст.

Ёдовар мешавем, ки Тоҷикистону Қирғизистон беш аз 980 километр марзи муштарк доранд ва аз ин миқдор то кунун 300 километраш мушаххас ва аломатгузорӣ нашудааст. Аксари низоъҳои марзӣ низ дар ҳамин нуқтаҳои аломатгузоринашуда сар мезанад.

Тасмими интиқоли бобмҳои хушаии Амрико ба Украина баҳсбарангез шуд

Аз ҷониби

-

10/07/2023

Ҳафтаи гузашта Пентагон аз бастаи нави кумакҳои низомии худ ба Украина хабар дод. Амрико эълон кард, ки ин бастаи кумакҳо ба миқдори 800 миллион доллар мебошанд.

Аммо чизе, ки дар бастаи кумакҳои нави низомии Амрико ба Украина норизоиятӣ ва нигаронии кишварҳоро ба бор овардааст, ирсоли бомбҳои хушаӣ аст, ки ҷузъе аз ин кумакҳо маҳсуб мешаванд.

Дар пайи эълони Пентагон аз ин тасмимаш аксари кишварҳо ба далели хатарнок будани ин навъи таслиҳот бо Амрико мухолифат кардаанд. Кишвари Олмон низ аз ирсоли бомбҳои хушаӣ ба Украина мухолифат кард.

Ҳамзамон субҳи имрӯз сухангӯи Вазорати корҳои хориҷии Чин Мао Нин вокуниши кишварашро эълон кард. Мао Нин мегӯяд, ин тасмими Амрико ба маънои “равған рехтан ба оташи ҷанг” аст. Ва ҳушдор дод, ки “интиқоли ғайримасъулонаи ин таслиҳот метавонад мунҷар ба мушкилоти инсонӣ шавад.”

Амрико мегӯяд, Русия аз аввали ҷанг бо Украина аз ин навъи силоҳи хатарнок истифода мекард ва Украина ҳам уҳдадор аст, ки аз хоки худ ва шаҳрвандонаш ҳимоят кунад. Аммо вақти истифода аз бомбҳои хушаӣ бояд ба Амрико аз шеваи истифодаи онҳо гузориш бидиҳад.

Коршиносони низомӣ бар ин назаранд, ки ин навъи бомбҳо ба сабаби дер таркидан ва дар ҳамаҷо пароканда шуданашон барои мардуми осоишта бисёр хатарнок маҳсуб мешавад.

Наздики 130 кишвари дунё барои манъи истифодаи бомби хушаӣ муваофиқат кардаанд ва истифодаи онро иҷозат намедиҳанд. Ҳатто аксари муттаҳидони Амрико низ мегӯянд, бо вуҷуди ҷонибдорӣ аз Украина ва ирсоли муҳиммоти ҷангӣ ба ин кишвар, муухолифи ашаддии ирсол ва истифодаи ин навъи силоҳ дар Украина ҳастанд.

Ҳукми Рустам Саидаҳмадзодаро кам карданд

Аз ҷониби

-

10/07/2023

Додгоҳи олии Тоҷикистон аз ҳукми зиндони Рустам Саидаҳмадзода 1,5 солашро кам кардааст.

Рустам Саидаҳмадзода, собиқ додраси Додгоҳи ноҳияи Бобоҷон Ғафуров, ки бо содир кардани ҳукми сафед машҳур аст, моҳи апрели соли ҷорӣ бо иттиҳомоти қаллобӣ, нашри ахбори дурӯғ, баромадан аз ҳадди ваколати мансабӣ ва ғайриқонунӣ баровардани ҳукм ба 6,5 соли зиндон маҳкум шуда буд.

Худи Саидаҳмадзода иттиҳомоти мақомотро рад карда, хоста буд озодаш кунанд.

Радиои Озодӣ дар истинод ба манобеаш аз Додгоҳи олӣ хабар дод, ки зинаи кассатсионӣ охири ҳафтаи гузашта ҳукми Рустам Саидаҳмадзодаро аз 6,5 сол ба 5 соли зиндон тағйир додааст.

Собиқ додрас аз болои ҳукми нав боз шикоят мебарад ё не маълум нест.

Рустам Саидаҳмадзода соли 2017 додраси Додгоҳи ноҳияи Бобоҷон Ғафуров таъйин гардида, замоне номаш дар сархати расонаҳо қарор гирифт, ки соли 2021 як сокини вилояти Суғдро дар муҳокима бегуноҳ эълон кард. Дар Тоҷикистон додрасҳо кам нафаронеро бегуноҳ эълон мекунанд ва ҳукмҳои сафед ангуштшуморанд.

Ҳатто баъди содир кардани ин ҳукм Коллегияи тахассусии Додгоҳи олии Тоҷикистон Саидаҳмадзодаро ба вайрон кардани интизоми корӣ гунаҳкор кард. Аммо Кумисюни байналмилалии ҳуқуқшиносон ё ICJ баръакс аз мақомот хост, болои додрасҳо фишор наоранд.

Аз “табаддулоти мусаллаҳона” дар Туркманистон пешгирӣ шуд

Аз ҷониби

-

10/07/2023

Расонаҳои Туркманистон аз кӯшиши табаддулоти мусаллаҳона дар Ашқобод хабар медиҳанд.

Телеграм-канали Turkmen.news хабар медиҳад, ки дар моҳи июни соли ҷорӣ хадамоти вежаи Туркманистон аз талоши табаддулоти мусаллаҳона ҷилавгирӣ кардаанд. Мақомот дар натиҷа 20 шаҳрванди туркманро, ки аксаран аз вилояти Марӣ будаанд, боздошт кардааст. Айни замон гумонбарон дар боздошт қарор доранд.

Бино ба гузоришҳо, раҳбарии ин табаддулотро Батир Мередов, писари собиқ вазири кишоварзии ин кишвар Пайзигелди Мередов бар уҳда доштааст. Пайзигелди пас аз марги Ниёзов ба 19 соли зиндон маҳкум шуда, моҳи августи соли 2013 дар ҳамон ҷо даргузашта буд.

Гуфта мешавад, дар миёни боздоштшудаҳо муовини вазири умури дохилии Туркманистон Аҳмад Хоҷатов низ ҳаст. Хоҷатов то таъйин шуданаш ба ин мақом дар моҳи декабри соли 2018, сардори шуъбаи пулиси вилояти Марӣ буд.

Бино ба иттилои манбаъ, табуддулотгарон бо мошинҳои боркаш ба Туркманистон навъҳои гуногуни аслиҳаро интиқол додаанд.

Чанде пеш расонаҳо аз масдуд шудани Интернет дар ин кишвар хабар дода буданд. Сабаби масдуд шудани Интернет дар кишварро пинҳон доштани маълумот дар бораи як табаддулоти мусаллаҳона гуфтанд.

Интихоботи Узбекистон: Мирзиёев ҳам роҳро барои худ боз кард

Аз ҷониби

-

10/07/2023

Рӯзи якшанбе, 9-июли соли ҷорӣ дар Узбекистон интихоботи пеш аз муҳлати президентӣ баргузор шуд. Дар он 4 номзад барои дарёфти курсии раёсатҷумҳурӣ рақобат карданд.

Имрӯз, 10-уми июл Комиссияи марказии интихоботи ин кишвар натиҷаҳои аввалии интихоботро эълон кард. Тибқи он, Шавкат Мирзиёев, номзад аз Ҳизби либерал-демократи Узбекистон ва президенти феълии он бо ба даст овардани 87,05 дарсади оро барандаи мутлақи ин маъракаи сиёсӣ эълон гардид.

Аммо боқӣ номзадҳо овозҳои андаке дарёфт карда, мағлуб шуданд. Аз ҷумла, Робахон Маҳмудова, номзад аз Ҳизби сотсиал-демократии “Адолат” 4,43 %, Улуғбек Иноятов, номзад аз Ҳизби Халқии демократии Ӯзбекистон 4,02% ва Абдушукур Ҳамзаев, номзад аз Ҳизби экологӣ 3,74% овозҳоро соҳиб шуданд.

Бино ба гуфтаи Зайниддин Низомхочаев, раиси Комиссияи марказии интихоботи Узбекистон, дар интихоботи президентии ин кишвар 79,8% интихобкунанда ё 15,6 миллион нафар ба пойи сандуқҳои раъй рафтанд.

Мирзиёев баъд аз марги президенти собиқи Узбекистон Ислом Каримов дар соли 2016 ба сари қудрат омад. Ӯ ду маротиба президнти ин кишвар интихоб шуда буд ва тибқи қонун ду се сол пас мебоист курсиро холӣ кунад. Дар ин кишвар тибқи Қонуни асосӣ як нафар ду маротиба 5-солӣ ҳаққи президент буданро дошт, аммо Мирзиёв муддати президентиро аз 5 ба 7 сол боло бурд. Ва инаки 65-сола метавонад то соли 2037 зимоми қудратро дар даст дошта бошад.

Боздошти муҳоҷирон дар яке аз масҷидҳои Русия

Аз ҷониби

-

07/07/2023

Чанд рӯзи охир дар шаҳру ноҳияҳои Русия тафтишу боздошти муҳоҷирон дигарбора авҷ гирифтааст.

Дар наворҳои тозае, ки ба Azda.tv расида дида мешавад, ки гурӯҳе аз муҳоҷирон дар дохили биное биниву даҳони худро бо либосҳояшон пӯшондаанд. Ба гуфтаи корбарон, ин бино масҷиди шаҳраки Котелникии вилояти Маскави Русия буда, афроди сиёҳпӯш пас аз намози ҷумъаи имрӯз ба дохили он гази ашковар партофтаанд. Бо кадом далел ин афроди сиёҳпӯш, ки гуфта мешавад кормандони ОМОН-и Русия мебошанд, чунин амалеро анҷом додаанд, маълум нест.

Дар як навори дигаре дида мешавад, ки нафарони зиёде дар саҳни ин масҷид қатор истодаанд ва дар наздашон кормандони ОМОН ҳузур доранд.

Яке аз шоҳидони ҳодиса дар суҳбат ба Azda.tv гуфт, ки мақомоти интизомии Русия дар ин масҷид тафтиш ё ҳамон “рейд” гузаронидаанд.

Ба гуфтаи ӯ, дар байни боздоштшудаҳо онҳое, ки шиносномаи Русияро доштанд, озод шуданд, аммо ОМОН муҳоҷирони кориро барои тафтиши ҳуҷҷатҳо бо худ ба боздоштгоҳҳо бурданд.

То ҳол маълум нест, ки миёни онҳо чанд шаҳрванди Тоҷикистон ҳаст.

Аввали ҳафтаи ҷорӣ низ дар пайи як амалиёти мақомоти интизомии Русия чанд тан аз муҳоҷирони корӣ дар шаҳраки Котелникии вилояти Маскав боздошт шуда буданд.

Ба иттилои расонаҳои русӣ, нерӯҳои амниятии ин кишвар дар асоси шикояти сокинони руси ин шаҳрак нуқтаҳои кору хоби муҳоҷиронро тафтиш карданд.

Дар наворҳое, ки аз рафти ин тафтишҳо дар шабакаҳои иҷтимоӣ роҳ ёфт, дида мешавад, ки кормандони ОМОН қаҳвахонаи “Бек-бургер”, хобгоҳи “Белая дача” ва чойхонаи “Баракат”-и шаҳраки Котелникро тафтиш доранд. Қисме аз муҳоҷирон дастҳо пушти сар дар замин хобидаанд, қисми дигарро ба мошин савор карда ба шуъбаи пулис бурданианд.

Шабакаи телеграммии “Многонационал” менависад, ки дар натиҷаи ин “рейд” даҳҳо муҳоҷири хориҷӣ, ки ғайриқонунӣ дар Русия қарор доштанд, муайян карда шудааст ва чунин рейдҳо мунтазам идома хоҳанд ёфт.

Ба навиштаи ин шабака аксари муҳоҷирон зодагони Тоҷикистонанд.

Чанд моҳи ахир аст, ки дар шаҳру ноҳияҳои Федератсияи Русия аз ҷониби мақомоти ин кишвар тафтишу бозҷӯӣ ё “рейд”-и густурдаи муҳоҷирон идома дорад. Ва яке аз аввалин рейди густарда дар соли ҷорӣ дар шаҳраки Котелникии вилояти Маскав пас аз шикояти сокинони маҳаллии он ба Президенти Русия оғоз гардид.

То ин муддат наворҳои зиёде нашр шуда, ки дар онҳо дида мешавад, мақомоти интизомии ин кишвар муҳоҷиронро гурӯҳ-гурӯҳ боздошт намуда, ба боздоштгоҳҳо мебаранд.

Ба гуфтаи муҳоҷирон, мақомоти рус ҳам шаб ва ҳам рӯз ҷойи кор ва макони истиқомати онҳоро тафтиш намуда, чӣ аснод дошта бошанд чи на, ҳамаро якҷоя боздошт мекунанд. Вале, ба гуфтаи муҳоҷирон, касе ҳуҷҷатҳои лозимаро дошта бошад, озод мекунанд, аммо онҳое, ки ҳуҷҷат надоранд боздошту ихроҷ мешаванд ва ҳатто табқи хабарҳои тасдиқнашуда, муҳоҷирони боздоштшударо ба ҷанги Украина ҷалб кардаанд.

Видоъи гумонбар дар қатли Исматуллоев бо модараш пеш аз марг

Аз ҷониби

-

07/07/2023

Рустам Ашӯров, гумонбар дар қатли муовини раиси “Ориёнбонк” пеш аз маргаш бо модараш видеоӣ занг зада, видоъ мекунад ва мегӯяд, “зиқ нашавед дар қиёмат вомехӯрем иншоаллоҳ”.

Имрӯз, 7-уми июл дар шабакаҳои иҷтимоӣ навори гуфтугӯи Рустам Ашӯров бо модараш нашр шуд, ки зоҳиран он баъд аз куштани ду маъмури амниятии Фурудгоҳи Кишинёви Молдова ва лаҳзае пеш аз ҳамла алайҳи худаш сабт шудааст.

Рустам Ашӯров дар ин навор ба модараш мегӯяд, ки ду маъмури амниятии фурӯдгоҳро куштааст. Ва ҳатто ҷасади хобидаи онҳоро нишон медиҳад.

Инчунин Афшӯров дар ин суҳбат иқрор мешавад, ки Шуҳрат Исматуллоев, муовини раиси “Ориёнбок”-ро ӯ ҳамроҳи як нафари дигар бо номи Дилшод СБ куштаанд. Вале ӯ мегӯяд, дар қатли Исматуллоев мустақим даст надорад.

Ин собиқ милисаи тоҷик дар суҳбат бо модараш мегӯяд, Дилшод чанде пеш ба ӯ гуфта будааст, ки “як одам ҳудуди 200 миллион доллар “Биткоин” дорад, биё ӯро медуздему “Биткоин”-ҳояшро мегирем ва худашро ҷавоб медиҳем.” Дар идома меафзояд, “рафтем унҷа, иқа задак задакша, ки мурд ӯ одам.”

Модараш аз Рустам мепурсад, ки “Ту вайя чӣ кор кардӣ?”, ӯ мегӯяд: “Ман ҳамроҳашон будам” модараш боз мепурсад, ки “Ту ягон кор кардӣ?” Рустам мегӯяд, “Не, ман фақат (пас аз мурдан ҷасадро) гирифта, дар дарёи Варзоб партофтам”.

Дар пайи расонаӣ шудани ин навор, корбарон дар шабакаҳои иҷтимоӣ мегӯянд, қазия бузургтар аз 200 миллион доллар “Биткоин” аст. Аксари корбарон фармоишгарони ин ҷинояти мудҳишро шахсони наздик ба хонаводаи Эмомалӣ Раҳмон тахмин мезананд.

Раҷаби Мирзо, рӯзноманигори шинохтаи тоҷик менависад, ки “ФАРМОИШГАРОН ОН ҚАДАР ТАЪСИРГУЗОРАНД, КИ ҚОТИЛОН МАРГРО АЗ ОШКОР КАРДАНИ ОНҲО БЕҲТАР МЕДОНАНД?“

Ӯ дар идома навиштааст: “Рустам- яке аз қотилони муовини раиси Ориёнбонк, ки дар Молдова кушта шуд, зимни сӯҳбати охирин бо модараш мегӯяд, ҳамроҳаш – Дилшодро ҳам, ки ҳоло дар ҷустуҷӯст, “зинда намегиранд, худашро мекушад”.

Пас онҳо кадом асрори муҳимро бо худ бурданианд. Яъне масъала аз “гирифтани биткоин ба арзиши 100-200 миллион доллар”, ки дар ин сӯҳбат ишора мешавад, фаротар аст ва фармоишгарони ин ҷиноят он қадар таъсиргузоранд, ки инҳо маргро аз ошкор кардани онҳо беҳтар медонанд?“

Ҳамзамон Амруллоҳи Низом, рӯзноманигори тоҷик ва фаъоли шабакаҳои иҷтимоӣ низ дар паёме навишта, ки “Ба ғайр аз раис Ҳасан Асадуллозода ва ё хоҳарзодааш Зарина Раҳмон кӣ метавонад фармоишгари қатли Шуҳрат Исматуллозода бошад?“

Ёдовар мешавем, ки Рустам Ашӯров, шаҳрванди 43-солаи Тоҷикистон шоми 30-юми июн дар фурӯдгоҳи Кишинёв, замоне ки ба ӯ иҷозаи убур аз марзи ин кишварро надоданд, аз камари муовини сардори Нерӯҳои марзбонии Молдова дар фурӯдгоҳ Сергей Мунтияну туфангчашро гирфта, ӯ ва як маъмури бахши амниятиро кушт ва бар асари тирҳои ҷавобӣ Ашӯров захмӣ шуда, давоми се рӯз дар як бемористони ин кишвар дар ҳолати беҳушӣ қарор дошт. Дар ниҳоят ӯ шаби 3-уми июли соли ҷорӣ даргузашт.

Рустам Ашӯровро дар Тоҷикистон дар ҷинояти рабудани Шуҳрат Исматуллоев, муовини раиси “Ориёнбонк” гунаҳкор медонанд ва алайҳаш парванда боз шуда буд.

Вазорати дохилаи Молдова ба хабарнигорон гуфт, ки “Мо муайян кардем, ки Рустам Ашӯров собиқ корманди милисаи Тоҷикистон буда ва дар ин сохтор 7 сол кор кардааст.” Инчунин гуфта мешавад, Ашӯров бо иттиҳоми ғоратгарӣ аз вазифа ронда шуда ва зиндонӣ ҳам шудааст.

Расонаҳои маҳаллӣ рӯзи гузашта 3-уми июл аз вахим будани вазъи саломатии Ашӯров гузориш дода буаданд. Вале аксари ҷомеаи тоҷик зинда мондани ӯро орзу мекард, то сирри рабудан ва фармоишгарони ҷинояти қатли занҷираии муовини раиси “Ориёнбонк” Шуҳрат Исматуллоев фош шавад.

Мақомоти Тоҷикистон то кунун ба гумони даст доштан дар рабудани Шуҳрат Исматуллоев 4 нафар аз собиқ афсарони ниҳодҳои қудратиро боздошт кардаанд.

Радиои Озодӣ аз манобеи худ дар ниҳодҳои интизомӣ ва наздик ба тафтишот хабар дод, ки собиқ афсарон “ҳамроҳ бо ҷинояткорони собиқадор ин одамрабоиро анҷом додаанд”.

Ба иттилои манбаъ, яке аз боздоштшудагон афсари собиқи Вазорати корҳои дохилӣ ва Ожонси мубориза бо фасод будааст. “Ва як манбаи наздик ба хонаводаи Шуҳрат Исматуллоев мегӯяд, бо гумони ширкат дар ин ҷиноят як додситони собиқ низ боздошт шудааст.”

Боздошти як тоҷик бо ҳамсараш дар Ҳолланд бо иттиҳоми терроризм

Аз ҷониби

-

06/07/2023

Бино ба гузориши расонаҳои ҳолландӣ, мақомоти пулиси ин кишвар рӯзи панҷшанбе, 6-уми июл як шаҳрванди 29-солаи Тоҷикистонро бо ҳамсараш боздошт кард.

Гуфта мешавад, ин марди тоҷик ҳамроҳи ҳамсари 31-солаи қирғизаш аз соли 2022 дар Ҳолланд ба сар мебурдаанд. Ҳамсари ӯ дар шаҳри Бреда ва худи мард дар шаҳри Эйндҳовени Ҳолланд боздошт шудаанд.

Пулиси ин кишвар мегӯяд, ҳардуи онҳо дар содир кардани амалҳои омодагӣ ба ҷиноятҳои террористӣ гумонбар мешаванд. Вале, ба гуфтаи пулис, шаҳрванди 29-солаи Тоҷикистон ба узвият дар созмони террористии ДИИШ низ гумонбар аст.

Пулиси Ҳолланд дар ҳамкори бо Хадамоти умумии истихборот ва амният (AIVD)-и ин кишвар гумонбаронро пайгирӣ ва боздошт кардааст. Мақомоти ин кишвар мегӯянд, тафтишоти пешакии пулис мушаххас карда, ки ин марди зодаи Тоҷикистон узви ДОИШ буда ва ба ӯ дастури тарҳрезии ҳамлаи террористӣ дода шудааст.

Гуфтанист, гумонбарон рӯзи ҷумъа, 7-уми июл ба Додгоҳи тафтишотӣ дар Роттердам оварда шуда, ба ҳабси пешакӣ гирифта мешаванд. Ба онҳо танҳо иҷоза дода мешавад, ки бо вакилони худ дар тамос бошанд.

Мақомоти пулиси Ҳолланд мегӯяд, боздоштшудаҳо бо чанд нафари дигар, ки дар Олмон зиндагӣ мекардаанд, дар тамос будаанд ва дар пайи тафтишоти пулиси ҳарду кишвар онҳо мушаххас ва боздошт шудаанд.

Мақомоти додситонии Олмон ҳам рӯзи панҷшанбе, 6-уми июл аз боздошти 7 нафар бо иттиҳоми терроризм хабар дод. Azda tv қаблан гузориш дод, ки 5 нафари онҳо низ шаҳрвандони Тоҷикистон мебошанд.

Боздошти панҷ зодаи Тоҷикистон бо иттиҳоми терроризм дар Олмон

Аз ҷониби

-

06/07/2023