Оморҳои ахир аз Туркия ва Сурия аз он ҳикоят доранд, ки шумори қурбониёни заминларзаҳои шадид аз марзи 41 ҳазор нафар убур кардааст.

Имрӯз, 15-уми феврали соли 2023, тибқи оморҳои расмӣ, теъдоди қурбониён дар Туркия ба 35 ҳазору 418 нафар расида ва шумори ҷонбохтагони Сурия бар асоси бархе оморҳо аз марзи 5 ҳазору 500 нафар гузаштааст.

Ин дар ҳолест, ки шумори маҷрӯҳон дар Туркия ҳудуди 90 ҳазор нафарро ташкил медиҳад. Мақомоти ин кишвар гуфтаанд, ки зиёда аз 50 ҳазор бино дар ҳолати садамавӣ қарор доранд ва бояд фавран вайрону валангор карда шаванд, то ба касе осеб нарасонанд.

Инчунин Вазири корҳои дохилии Турия эълон карда, ки ҳодисаҳои ахир дар ин кишвар ба беш аз 50 дарсади биноҳо дар вилояти Ҳатай зарар расонидаанд. Вазъи ҳазорҳо бино дар Сурия низ дар ҳолати садамавӣ гузориш мешавад ва ҳазорон нафар аз сокинон аз тарси он ки хонаҳо болои сарашон чапа нашаванд, манзилҳои худро тарк карда, дар кӯча мондаанд.

Пеш аз ин мақомоти Туркия эълон карда буданд, ки барои кумаки зарардигон ва наҷоти одамони зери вайронаҳо боқимонда зиёда аз 245 ҳазор нафар аз кормандони давлатӣ, артиш, гурӯҳҳои наҷот ва ризокорон ба ҷойҳои ҳодиса сафарбар шудааст.

Инчунин ватқе ин хабар таҳия мешуд, аз Қаҳрамонмараши Турия хабар расид, ки гурӯҳҳои наҷот як бонуи 42-соларо пас аз 2 саду 22 соат аз зери вайронаҳо зинда берун оварданд ва ин хабар ба дигар гурӯҳҳои наҷот, ки дар ҷои ҳодиса масруфи корҳои бартарафкунии зарарҳо ва наҷоти мардумон ҳастанд, рӯҳияи тозае дода, ки то корҳои наҷотдиҳии худро суръат бахшанд.

Гуфта мешавад, минтақаи Қаҳаронмараши Туркия, маркази ин заминҷунбиҳои субҳи 6-уми феврали соли ҷорӣ будааст, ки тибқи ҷадвали Рихтер аввалӣ 7,9 дараҷа ва дувумӣ 7,5 балл сабт шудаанд ва пасларзаҳои он то ҳол идома доранд, ки шадидтарини онҳо дирӯз бо бузургии 4,9 балл ба қайд гирифта шуд.

Бино ба иттилои расонаҳо, рӯзи душанбе дар шаҳрҳои Исроил садҳо ҳазор нафар алайҳи қонуни “ислоҳоти давлат дар бораи додгоҳҳо” ба кӯчаҳо баромада, даст ба эътироз заданд.

Расонаҳои исроилӣ шумораи эътирозгаронро беш аз як миллион нафар мегӯянд. Гуфта мешавад, эътирозгарон гирдиҳамоии бузургро баъд аз зуҳри рӯзи душанбе, 13-уми феврали соли ҷорӣ дар муқобили парлумони Исроил шуруъ карданд.

Чанде пеш Ҳукумати Бинёмин Натанёҳу тариқи парлумон дар қонуни додгоҳҳо ислоҳот ворид кард. Тибқи ин ислоҳот, “қарорҳои додгоҳи олиро метавон бо раъйи аксарият дар парлумон бекор кард ва инчунин сиёсатмадорон бояд дар таъйини додрасҳо нуфузи бештар дошта бошанд.”

Аммо мардум ба ин ислоҳот эътироз карданд ва мегӯянд, ки бархе аз чеҳраҳои муҳими давлати кунунӣ, аз ҷумла шахси нахуствазир, Бинёмин Натанёҳу ба қаллобӣ ва пулшӯӣ муттаҳаманд ва алайҳи онҳо парвандаи фасоди молӣ боз шудааст. Ва давлати Натанёҳу мехоҳад бо ворид кардани ин ислоҳот таҳқиқот дар бораи худ ва аъзои ҳукуматашро бекор кунад.

Эътирозгарон мегӯянд, ислоҳот дар низоми додгоҳии давлат, демократия ва ҳокимияти қонунро дар ин кишвар зери хатар меандозад.

Давлати кунунии Исроил бо раҳбарии Натанёҳу, ифротӣ ва мазҳабитарин кобинаи давлат дар торихи ин кишвар дониста мешавад.

Дар ҳамин ҳол, бо вуҷуди мушкилоти дохилӣ ва эътирозот алайҳи давлати Натанёҳу нерӯҳои исроилӣ ба Каронаи Бохтарӣ юриш бурда, бо силоҳҳои вазнин баъзе нуқтаҳои шаҳри Ғаззаро бомборон карданд.

Бино ба иттилои расонаҳои маҳаллӣ, танҳо дар давоми як моҳи гузашта наздик ба 50 нафар аз сокинони осоиштаи фаластинӣ, аз ҷумла кӯдакону пиронсолон дар ҳамлаҳои нерӯҳои исроилӣ кушта шудаанд.

Гуфта мешавад, дар ҳамлаҳои интиҳории фаластиниҳо низ дасти кам 10 исроилӣ кушша шудааст.