Колаж аз Регнюм
Шоми дирӯз, 21-уми феврали соли 2022 раиси ҷумҳури Русия Владимер Путин бо имзои ду санад ҷумҳуриҳои худхондаи Луганск ва Донетск, минтақаҳои ҷудоихоҳон шарқи Укроинро ба расмият шинохт.
Путин ба дунболи ба расмият шинохтани ин минтақаи ҷудоихоҳони Укроин аз нерӯҳои мусаллаҳи кишвараш хост, ки барои таъмини сулҳу оромӣ ба ҳар ду минтақа нерӯҳои “посдори сулҳ”-и Русияро эъзом кунанд.
Ин иқдоми Русия аз тарафи мақомоти расмӣ дар Укроин ва шарикони он дар Ғарб, бахусус кишварҳои узви НАТО ва муттаҳидони онҳо бо вокунишҳои баъзан тунд ва мухталиф рӯбарӯ шуд.
Аз ҷониби дигар Шӯрои амнияти Созмони Миллали Муттаҳид ҳам бо ташкили як ҷаласаи фаврӣ ин иқдоми Русияро маҳкум карда, гуфта, ки Путин “Созишномаи Минск”, қонунҳои байналмилалӣ, ҳокимияти миллӣ ва тамомияти арзии Укроинро зери по кардааст.
Аз сӯи дигар Президенти Амрико низ субҳи имрӯз 22-юми феврал бо имзои як санад Ҷумҳурии мардумии Луганск ва Донетск, ҳар минтақаи ҷудоихоҳонои Укроинро таҳрик намуда, таъкид кардааст, ки ҳеч шаҳрванди амрикоӣ ҳаққи сармоягузорӣ карданро дар он ду минтақа надорад ва ҳар касе ҳам бо он ду ҳамкорӣ кунад, зери таҳрим қарор гирифта, дороиҳояш дар ИМА ба ҳасб гирифта мешаванд.
Ҳамзамон кишварҳои Бритониё ва Фаронсаву Олмон дар Иттиҳоди Аврупо таҳдид кардаанд, ки бояд алайҳи Русия барои иқдомҳояш таҳримҳои сахтареро ҷорӣ кард.
Кишварҳои Аврупо дар таъмини энержии мавриди ниёзҳои худ, бахусус гази табиӣ ба Русия вобастгии сахте доранд, ба ин хотир ҳар замоне Иттиҳоди Аврупо ба ҷорӣ кардани таҳримҳое алайҳи Русия иқдом кунад, Маскав дарҳол ба таҳдид гузашта, дар таъмин ва нархи гази содиротиаш ба Аврупо таҷдиди назар мекунад. Ин амр боис мешавад, ки Иттиҳоди Аврупо дар хеле мавридҳо аз ташдиди танишҳои иқтисодӣ ҷилавгирӣ карда, аз шиддати таҳримҳои худ бикоҳад.
Бо ин ҳол масъулони Иттиҳоди Аврупо дирӯз эълон карда буданд, ки ба дунболи таъминкунандаҳои бо эътимоди газ ҳастанд ва дар замистони оянда кишварҳои аврупоӣ аз вобастагии Русия дар таъмини газ раҳо хоҳанд ёфт.
Аз ҷамъи кишварҳои исломӣ вокуниши сареъ ва нисбатан “тунд”-и Туркия, ки нисбат ба дигар кишварҳои узви НАТО робитае хубе ҳам бо Русия дорад, дар робита ба ин иқдоми Путин хеле аз русзабоноҳоро ба гунае ғофилгир карда, ки онро ҳамчун “ханҷар аз пушт” унвон карданд.
Тукрия дар ин хусус бо сароҳат эълон кард: “Қарори Федератсияи Русия дар бораи эътирофи ҷумҳуриҳои ба истилоҳ Донетск ва Луҳанск, илова бар хилофи Созишномаи Минск, нақзи ошкори ваҳдати сиёсӣ ва тамомияти арзии Украинаро ташкил медиҳад. Қарори Федератсияи Русия ғайри қобили қабул аст ва мо онро рад мекунем.”
Ҳамзамон Сухангӯи Вазорати умури хориҷаи Эрон Саид Хатибзода, ки дар ин бора бо эҳтиёт суҳбат мекард, гуфта ” мо бо ҳассосият мавзӯъҳои муртабит бо ин қазияро пайгирӣ мекунем. Ҷумҳурии исломии Эрон тамоми тарафҳоро ба хештандорӣ даъват ва муътақид аст бояд аз ҳар гуна иқдоме, ки ба ташдиди танишҳо мунҷар шавад, иҷтиноб кард.”
Гуфта мешавад, Раисҷумҳури Русия пеш аз имзои санади ба расмият шинохтани ин ду ҷумҳурии ҷудоихоҳ бо сарони баъзе аз кишварҳои аврупоӣ, аз ҷумла садри аъзами Олмон Олаф Шолтс ва Раисҷумҳури Фаронса Эмануэл Макрон телефонӣ суҳбат карда, аз ин иқдомаш онҳоро огоҳ кардааст.
Дар пайи ин иқдоми Русия Президенти Украина Владимир Зеленски ин онро ҳамла ба тамомияти арзии худ хонд ва ҷамъе аз давлатҳои Аврупо ва кишварҳои узви НАТО низ ҳамбастагии худро бо Укроин эълом карданд.
Тоҷикистон ва дигар кишварҳои узви Иттиҳоди кишварҳои муштаракулманофеъ, ки собиқ кишварҳои Шӯравӣ ва алъон ҳам зери чатри Русия қарор доранд, ҳар чанд Укроинро шарики худ медонанд, вале то кунун дар бораи ин иқдоми Русия расман вокуниш накардаанд.
Амруллоҳи Низом, махсус барои Аздо тв
