Вазорати мудофииа Ҷумҳурии Тоҷикистон аз пурра иҷро шудани нақшаи даъвати баҳории ҷавонон ба сафи Қувваҳои мусаллаҳи кишвар хабар дод.

Бино ба иттилои сомонаи ин вазорат, ВМКБ дар рӯзи аввали даъват ба артиш  аз иҷрои нақша хабар дода, дар нимаи аввали моҳи апрел шаҳри Душанбе ва то охири моҳи май тамоми шаҳру ноҳияҳои ҷумҳурӣ нақшаро пурра иҷро карданд.

Вазорати мудофиаи кишвар аз ҳукуматҳои шаҳру ноҳияҳо, ки дар сатҳи зарурӣ ташкилу ба роҳ мондани ҷалби шаҳрвандони синни даъватӣ пешсаф буданд ва волидоне, ки фарзандонашон ихтиёрӣ ба комиссияҳои даъватӣ ҳозир гардидаанд, изҳори сипосу миннатдорӣ намудааст.

Ҳамзамон Вазорат таъкид карда, ки бо вуҷуди пурра иҷро шудани нақшаи даъват ба артиш, тибқи моддаи 28-и Қонуни Ҷумҳурии Тоҷикистон “Дар бораи уҳдадории ҳарбӣ ва хизмати ҳарбӣ”, ки соли 2020 қабул гардида буд,  “ҷавонони синни даъватӣ бо мақсади гузаронидани омӯзиши пешаздаъватӣ ва баҳри омода намудани онҳо ба комиссариатҳои ҳарбии маҳалли истиқомат даъват карда мешаванд”. Яъне, тибқи ин модда мақомот метавонанд давоми сол ҳар вақт ҷавононро ба комиссариат даъват ва барои ба артиш ҷалб намудан омода намоянд.

Ёдовар мешавем, ки даъвати баҳории ҷавонон барои хидмат дар сафи Қувваҳои мусаллаҳи Тоҷикистон ҳамасола аз 1-уми апрел оғоз шуда, то 31-уми май идома мекунад.

Дар ин мавсими навтӣ хабару наворҳои зиёде дар бораи ҷалби иҷбории ҷавонон ва ҳатто донишҷӯён расонаӣ шуд.

Мақомот ба фарқ аз солҳои қабл дар ин даъвати баҳорӣ аз шеваи нав истифода бурданд. Шеваи нави даъват ин буд, ки Вазорати маориф ва илми Тоҷикистон бар асоси мактуби роҳбари Дастгоҳи иҷроияи Президенти Тоҷикистон Озода Раҳмон, ба ҳамаи хатмкунандагони донишкадаву донишгоҳҳои Тоҷикистон иҷозат дода мешуд, ки “ихтиёран” имтиҳони хатмро пеш аз муҳлат супорида, ба артиш раванд.

Баъди ин мактуб, расонаҳои ҳукуматӣ аксҳои зиёди донишҷӯёнро нашр намуда, гуфта буданд, ки донишҷӯён имтиҳонҳои хатмро пеш аз муҳлат супорида ихтиёран ба артиш рафтаанд. Вале дар ҳамин ҳол, қисми зиёди хатмкунандагон ва волидонашон ба расонаҳо шикоят карданд, ки онҳоро маҷбур кардаанд, то имтиҳонро пеш аз муҳлат супорида, ба артиш раванд.

Мавзуи ҷалби ҷавонон ба артиш дар Тоҷикистон солҳо боз доғ мемонад. Ҳамасола дар сафи Қувваҳои мусаллаҳи ҶТ чандин сарбоз шиканҷа ва бар асари он ҷон медиҳанд. Бештари ҷавонони тоҷик аз сабаби номусоид будани шароити сарбозӣ аз артиш мегурезанд ва мақомот бо тарзи маҷбурӣ ё “облава” ҷавононро дар кӯчаву бозорҳо ва ҳатто аз назди донишгоҳҳо боздошт карда ба артиш мебаранд.

Раҳбари Эрон дар мулоқот бо Президенти Тоҷикистон гуфт, ” таваҷҷӯҳ ба зарфиятҳои дарунӣ аслиҳаи таҳримро аз кор меандозад.”

Асри дирӯз, 30-юми майи соли 2022 Президенти Тоҷикистон Эмомалӣ Раҳмон дар Теҳрон ба мулоқоти Раҳбари Инқилоби Ҷумҳурии Исломии Эрон Сайид Алии Хоманӣ рафт.

Раҳбари Эрон дар ин мулоқот бо Президенти Тоҷикистон гуфт, “нигарониҳои Эрон ва Тоҷикистон дар бораи Афғонистон муштарак аст” ва дар бораи вуҷуди таҳримҳо афзуд, “он чизе, ки ин аслиҳаро аз кор меандозад, таваҷҷӯҳ ба нерӯҳо ва зарфиятҳои дарунӣ аст.“

Инчунин ҷонибҳо дар ин мулоқот “масъалаҳои ҳамкории ду кишвар дар соҳаҳои сиёсӣ, иқтисодиву тиҷоратӣ, фарҳангиву башарӣ, амниятӣ ва дигар арсаҳои мавриди манфиати тарафайнро муҳокима карданд.”

Гуфта мешавад, Эмомалӣ Раҳмон пас аз 9 соли вақфа ба Эрон сафар кард. Дар ин 9 сол то тавонист бар алайҳи ҷумҳурии исломӣ тохт, фаъолиятҳои сиёсӣ, иқтисодӣ ва фарҳангии Эрон дар Тоҷикистонро маҳдуд кард. Расман Теҳронро ҳомии терроризми байналмилалӣ муаррифӣ намуда, даҳҳо нафар аз таҳсилкардаҳои тоҷик дар Эрон бо баҳонаҳои мухталиф боздошт ва ба зиндон фиристод. Аммо диплумосии нарми Эрон дирӯз Эмомалӣ Раҳмонро маҷбур кард, ки дар қалби Теҳрон назди парчами Эрон таъзим кунад.

Ба иддаои ВКД ин нафарҳо аз 18-уми майи соли ҷорӣ дар ҷустуҷӯи расмӣ қарор дошта, 31-уми май, соати 09:30 дар натиҷаи гузаронидани амалиёти ба ном “зиддитеррористӣ” дар баландкӯҳҳои деҳаи Дерзуди ноҳияи Рӯшон ба қатл расонида шудаанд.

Кушташудагон Ғуломҳайдаров Ёдгор Мамадбекович, соли таваллудаш 1974, истиқоматкунандаи деҳаи Дерзуд, Почоев Алишер Сафармамадович, соли таваллудаш 1976, истиқоматкунандаи деҳаи Вамар, Мавлододов Ҳабиб Феткаевич соли таваллудаш 1987, истиқоматкунандаи деҳаи Дерзуд, Шехбуров Ҷангибек Душанбиевич, соли таваллудаш 1992, истиқоматкунандаи деҳаи Вамар, Палаев Дохунда Худобандаевич, соли таваллудаш 1969, истиқоматкунандаи деҳаи Вамар мебошанд.

Маълум нест ин нафарон дар кадом ҳолат ба қатл расонида шудаанд, аммо ВКД менависад, ки онҳо “ҳангоми нишон додани муқовимати мусаллаҳона безарар карда шуданд”.

ВКД ҳамаи ин нафаронро “аъзоёни гурӯҳи муташаккили ҷиноятӣ ва террористӣ” номида, аз зинда дастгир шудани “яке аз роҳбарони ин гурӯҳ” Палаев Қулмаҳмад Каримович, соли таваллудаш 1974, истиқоматкунандаи деҳаи Вамар хабар додаааст.

Дар идома ВКД менависад, ки “зимни азназаргузаронии ҷойи ҳодиса, ки дар баландии 2800 метр аз сатҳи баҳр ва фосилаи 1 км аз хати Сарҳади давлатӣ байни Тоҷикистон ва Афғонистон ҷойгир аст, 1 адад силоҳи мерганӣ бо 200 дона тир, 1 адад пулемёти Калашников бо 150 дона тир, 1 адад гранатомёти зиддитанкӣ бо 3 адад гулӯла, 4 автомати Калашников бо 5 тирдон ва 135 дона тир, 5 адад норинҷаки дастӣ ва 2 адад таппончаи Макаров бо 50 дона тир дарёфт ва мусодира карда шуданд” .

ВКД дар ҳоле аз ин амалиёти ба ном “зиддитеррористӣ” хабар медиҳад, ки як рӯз пеш яъне шоми 30-юми май дар сомонааш исми 10 сокини ноҳияи Рӯшонро, ки бо иттиҳоми даст доштан дар эътирозҳои ахир дар ноҳияи Рӯшон таҳти ҷустуҷӯ қарор доштаанд, нашр карда буд. Ва субҳи имрӯз чанд тани ин нафарони дар ҷустуҷӯ қарор дошта, боздошт ва ба қатл расонида шудаанд.

Таҳқиқ ва ростиозмоии он чӣ Вазорати корҳои дохилӣ дар бораи қатли ин сокинони ВМКБ мегӯяд, дар ҳоли ҳозир барои Аздотв имконнопазир аст, аммо дар гузашта кормандони ин вазорат худашон чандин ҷиноятҳои сангини дигаре ба мисли қатли собиқ вазири корҳои дохилӣ генерал Маҳмадназар Салихов-ро анҷом дода, сипас ба мардум дурӯғ гуфта буданд, гӯё вай худаш худкӯшӣ карда бошад.