Мутахассиси 55-солаи хорватӣ Петр Сегрт сармураббии нави тими миллии Тоҷикистон таъин шуд. Ӯ дастаи мунтахаби кишварро ба мусобиқаи интихобии Ҷоми Осиё-2023, ки аз 8 то 14-уми июни соли ҷорӣ баргузор мешавад, омода мекунад.

Мутахассиси хорватӣ иҷозатномаи мурабигии “Pro”-и UEFA-ро дошта, дар маҷлиси Кумитаи ичроияи Федератсияи футбол, ки имрӯз баргузор гардид, ба ҳайси сармураббии тими футболи Тоҷикистон интихоб шуд.

Курсии сармураббии тими миллии Тоҷикистон аз моҳи июни соли 2021  баъди тамдид нашудани қарордоди мураббии ӯзбек Усмон Тошев 7 моҳ боз холӣ монда буд.

Петр Сегрт 8-уми майи соли 1966 дар Хорватия ба дунё омада, вале дар Олмон ба воя расидааст. Ӯ ҳамчун бозигар дар дастаҳои ҳаваскори Олмон бозӣ мекард ва собиқаи мураббигиашро низ аз дастаҳои ҳаваскор сар кард. Аз соли 1996 ба ҳайси ёвари Клаус Топмёллер дар дастаи “Бохум”, баъдан дар “Дуйсбург” ва “Валдхоф” дар тими мураббиёни ин дастаҳо кор кардааст.Сипас чанд тими Австрия, аз ҷумла «Леобен», «Рид» ва «Винер Шпорт-Клуб»-ро роҳбарӣ кардааст.

Соли 2006 Сегрт ба Гурҷистон рафта, раҳбарии тими ҷавонони он кишварро ба дӯш гирифт, дар ду бозӣ сарпарасти тими миллии Гурҷистон буд. Баъди тарки Гурҷистон Петар Шегрт чанд дастаи Индонезия ва тимҳои миллии Афғонистон ва ҷазираҳои Малдивро роҳбарӣ кардааст.

Фардо, 28-уми январ соати 11:00 ба вақти маҳаллӣ дар дафтари Федератсияи футболи Тоҷикистон мутахассиси хорватӣ Петр Сегрт ба ҳайси сармураббии нави тими миллии Тоҷикистон нишасти матбуотӣ баргузор мекунад.

11 варзишгари тоҷик муборизаро барои дарёфти ҷоиза дар Қаҳрамонии бокси Осиё байни ҷавонони то 22-сола дар Тошканд идома медиҳанд.

Бино ба иттилои Кумитаи миллии олимпӣ ба ин мусобиқа 18 варзишгари тоҷик иштирок карданд, ки танҳо ба 11 нафар муяссар шуд мусобиқаро дар даври ниманиҳоӣ (9 нафар) ва ниҳоӣ (2 нафар) идома диҳанд. Даврҳои ниманиҳоӣ ва ниҳоӣ рӯзҳои 27-ум ва 29-уми январ баргузор мегарданд.

Даври ниманиҳоӣ:

51кг – Акбаралӣ Абдураҳмонзода – Ҷаъфар Ҳошим Мусо (Ироқ)

57кг – Хусравхон Раҳимов – Дилшод Абдумуров (Узбекистон)

67кг – Расул Аҳадов – Ҷавлонбек Юлдошев (Узбекистон)

48кг – Сумайя Қосимова – Ҳикару Като (Ҷопон)

52кг – Ҳусния Холова – Фирӯза Казакова (Узбекистон)

63кг – Малика Нозимова – Мунмарсурен Тсегтсегдари (Муғулистон)

75кг – Абдумалик Болтаев – Ризо Толиб Ҷаббор (Ироқ)

80кг – Некрӯз Салимов – Омурбек Бекжигит уулу (Қирғизистон)

86кг – Шаҳбоз Ҳаитов – Бакит Токтосун уулу (Қирғизистон)

Даври ниҳоӣ:

92кг – Давлат Болтаев – Рустам Урусбек уулу (Қирғизистон)

+92кг – Муҳаммад Аброриддинов – Ҷаҳонгир Зокиров (Узбекистон).

Аввалин Қаҳрамонии бокси Осиё миёни ҷавонони то 22-сола рӯзи 22-юми январ оғоз гардида, дар он 90 варзишгар аз 12 давлати қораи Осиё иштирок доранд.