Прокуратураи генералии Тоҷикистон алайҳи як ташкилоти перамидаи молиявӣ, ки ба қавли ин ниҳод дар кори онҳо ҷиноятӣ қаллобӣ ва фиреби мардум ошкор гардидааст, парванда боз намуда, намояндагони онро ҷустуҷӯ дорад.

Бино ба маълумоти Прокуратураи генералии Тоҷикистон ин ташкилот бо номи ҶДММ “Тозакор” сабт шуда, дар шакли перамидаи молиявӣ дар шаҳри Душанбе, вилояти Суғд ва вилояти Хатлон фаъолият мекардааст.

“Тафтишот муайян кард, ки ин гурӯҳи ҷиноятӣ худро намояндаи ташкилоти хориҷии ҶДММ “Аффинаж” (Ltd”Affinage”), ки гуё бо ташкилотҳои ба истихроҷ, нигохдошт, коркард ва фурӯши нафт, газ, тилло ва дигар ашёи хом машғул буда ҳамкорӣ дорад, муаррифӣ намуда, бо ваъдаи додани фоидаи калон барои маблағгузорӣ ба ҶДММ “Аффинаж” зиёда аз 300 нафар шаҳрвандонро ҷалб намуда, аз онҳо дар ҳаҷми аз 100 то 4000 доллари ИМА ба суратҳисоби бонкҳои берун аз кишвари худ ба маблағи умумии зиёда аз 150 000 доллари ИМА гузаронидаанд”.

Гуфта мешавад, айни замон 2 нафар аз аъзои ин гурӯҳ дастгир шуда, ҷустуҷӯи дигар нафарон идома дорад.

Ҳамчунин Прокуратураи генералии кишвар аз шаҳрвандон хоста, ки ҳарки дар натиҷаи фаъолияти ғайриқонунии ҶДММ “Аффинаж” (Тозакор) зарари моддӣ дидаанд ё ин ки оид ба фаъолияти ғайриқонунии ин гурӯҳи ҷиноятӣ маълумот доранд, метавонанд ба Прокуратураи генералии ҶумҳурииТоҷикистон муроҷиат намоянд.

Ширкати “Барқи тоҷик” иддао дорад, ки маҳдудияти интиқоли нерӯи барқро ба хонаҳои мардум “камтар” кардааст, аммо баъзе аз сокинон мегӯянд бо эълони сабукӣ дар маҳдудияти интиқоли барқ тағйиреро надиданд.

Ҳамчунин дар баъзе минтақаҳо шабонарӯзи охир интиқоли оби ошомиданӣ низ маҳдуд шудааст.

Нозирҷон Ёдгорӣ, сухангӯйи ширкати “Барқи тоҷик”, ба Радиои Озодӣ гуфт: “Маҳдудият сабук карда шуд. Ҳамакнун дар вақти ифтор ва оғози рӯзадорӣ интиқоли нерӯи барқ қатъ карда намешавад. Ҳамзамон “Барқи тоҷик” мавзӯи пурра бекор кардани маҳдудияти интиқоли нерӯи барқро баррасӣ дорад.”

Дар идома Ёдгорӣ қайд намуд, ки ба сабаби камии об маҷбур шудаанд, фаъолияти Маркази барқиву гармидиҳии Душанбе-2-ро ҳатто бо фарорасии ҳавои гарм идома диҳанд, то сокинони бо нерӯи барқ дастрасӣ дошта бошанд.

Ба иддаои сухангӯйи ширкати “Барқи тоҷик” оби рӯдхонаҳои бузурги кишвар дар муқоиса бо ҳамин давраи соли гузашта 30 дарсад кам аст ва лағви “лимит”-ро мушкил кардааст.

Дар ҳамин ҳол хабаргузории “Авесто” бо такя ба маълумоти Оҷонси омори Тоҷикистон хабар дод, ки бо вуҷуди ҷорӣ шудани маҳдудият дар истифодаи нерӯи барқ, Тоҷикистон интиқоли барқро ба хориҷа қатъ накарда, дар ду моҳи аввали имсол аз ҳисоби содироти нерӯи барқ ба хориҷ беш аз 7 миллион доллар даромад гирифтааст.

Мақомоти ширкати “Барқи тоҷик” сабаби идомаи содироти нерӯи барқро ба Афғонистон, барои дар ҳолати корӣ нигоҳ доштани хатҳои интиқоли нерӯи барқ мегӯянд.

Пештар ширкати “Барқи тоҷик” бо ширкатҳои барқрасони Афғонистону Узбекистон барои интиқоли нерӯи барқ дар соли ҷорӣ созишнома имзо карда буд. Интизор меравад, то поёни соли 2021 аз Тоҷикистон ба хориҷа беш аз 3 миллирад киловатт-соат нерӯи барқ содир шавад.

Ёдовар мешавем, ки дар Тоҷикистон моҳҳои ноябр-декабр шаҳрвандон аз ҷорӣ шудани лимити барқ шикоят карда мегуфтанд, ки барқ танҳо бо реҷаи муайянгардида рӯзона аз соати 7:30 то 17:30, шабона аз 22:30 то 5:00 сӯбҳ хомӯш карда мешавад.

Бо вуҷуди шикоятҳои пайдарпай ва сару садоҳои зиёди сокинон, “Барқи тоҷик” расман ҷорӣ гардидани лимитро тасдиқ накард ва ҳамеша намояндагони ин ширкат қатъ гардидани барқро вобаста ба корҳои таъмири истгоҳҳои барқӣ рабт медоданд.

Баъд аз шикояти пайдарпайи сокинон масъулони ширкати “Барқи тоҷик” расман рӯзи 10 декабри соли ҷорӣ аз мардуми кишвар барои қатъ гардидани барқ узр пурсида ва маҳдудиятро пурра бардоштанд.

Раисҷумҳури кишвар Эмомалӣ Раҳмон сокинони кишварро ҳушдор дода буд, ки агар барқро сарфакорона истифода накунанд, зарурати ҷорӣ кардани лимит пеш меояд. Гарчанде, ки захираи имрӯзаи об басанда ҳам бошад.

Баъд аз суханронии Эмомалӣ Раҳмон Ширкати “Барқи тоҷик” расман аз 5 январи соли равон эълон кард, ки интиқоли барқ аз соати 23 то 6-и субҳ дар деҳаҳо қатъ мешавад. Ин маҳдудият бо камтар кардани вақти он то ҳол идома дорад ва маълум нест он то кай идома хоҳад кард.  

Мухолифони ҳукумати Раҳмон мегӯянд, ки барқ дар кишвар аз ончи барои дохил лозим аст бештар тавлид мешавад. Ва “сабаби аслии ҷорӣ шудани лимитро дар он мебинанд, ки ҳукумат тарҷеҳ медиҳад ҳатто замоне, ки тавлиди барқ бо сабабҳои гуногун кам мешаваду танҳо барои масрафи дохил кофӣ аст, онро ба хориҷ бифурӯшад”.

Ба гуфтаи мухолифон барқро ба хориҷ ҳам ба ҳамон нархе мефурӯшанд, ки дар дохил ба мардум фурӯхта мешавад, аммо пулҳои барқи ба хориҷ фурӯхташуда на ба Тоҷикистон, балки ба хориҷ, ба ҳисоби офшории нафарони маълум интиқол дода мешаванд.

Ду корманди молиявии НБО Норак бо иттиҳоми азхудкунии музди меҳнати коргарон аз ҷониби маъмурони Агенти назорати молиявӣ ва мубориза бо коррупсияи Тоҷикистон айбдор ва боздошт гардиданд.

Гуфта мешавад, ин ду корманди молиявӣ наздики 2,5 милон сомонии музди меҳнати коргаронорро ба воситаи 38 корти пластикӣ тасарруф кардаанд.

Бино ба иттилои Агентии назорати давлатии молиявӣ ва мубориза бо коррупсияи Ҷумҳурии Тоҷикистон, ин ниҳод моҳи январи соли 2021 аз фаъолияти молиявию хоҷагии Неругоҳи барқии обии Норак ба номи Тӯрсун Ӯлҷабоев санҷиш гузаронид.

Дар рафти санҷиш муайян карда шуд, ки шахсони масъули моддии Неругоҳи мазкур ба воситаи 38 корти пластикӣ, музди меҳнати кормандонро ба маблағи умумии 2 млн. 383,1 ҳазор сомонӣ тасарруф намудаанд.

Аз маблағи зарари ошкоркардашуда дар рафти санҷиш 1 млн. 818,5 ҳазор сомонии он барқарор карда шуд.

Вобаста ба ҳолати мазкур нисбати шахсони масъули моддии  Неругоҳи болозикр Шишпаренко Ольга Владимировна ва Раҳматуллоев Лутфулло Изатуллоевич бо моддаи 245 қисми 4 банди “б” ва моддаи 323 Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, тафтиши пешакии он идома дорад.