Ҷустуҷӯ кунед
Ҷустуҷӯ
20.9 C
Dushanbe
Хона блог саҳифа 56

Ҳабси як зодаи Тоҷикистон бо гуноҳи хиёнат дар Русия

Аз ҷониби
AZDA-TV
-
0

Додгоҳи шаҳри Маскав зодаи Тоҷикистон Фирӯз Дадобоевро ба иттиҳоми хиёнат ба давлат маҳкум ба зиндон кард.

Мурофиа рӯзи 29-уми октябри соли ҷорӣ баргузор шуда, додрас Дадобоевро ба 13,5 соли зиндони низомаш сахт маҳкум карда ва инчунин 300 ҳазор рубли дигар ҷарима бастааст.

Бино ба иттилои расонаҳои русӣ, Дадобоев моҳи декабри соли 2022 боздошт ва то ин вақт дар СИЗО-и Лефортово нигаҳдорӣ мешуд.

Ӯ дорои шаҳрвандии Тоҷикистон ва Русия буда, дар яке аз ширкатҳои тиҷоратии шаҳри Маскав ба ҳайси мутахассиси IT кор мекардааст.

Хадамоти амнияти федеролии Русия (ФСБ) иддао дорад, ки Дадобоев ба маълумоти дорои сирри давлатӣ ғайриқонунӣ даст ёфта, қасд доштааст онро ба намояндаи Хадамоти иктишофии Амрико (CIA) супорад.

Гуфта мешавад, дар рафти тафтишот Дадобоев ба гуноҳаш иқрор шуда, изҳори пушаймонӣ кардааст, аммо маълум нест ӯ таҳти чӣ шароите гуноҳро ба дӯш гирифтааст. Назари наздикон ё вакили мудофеаш низ дастраси расонаҳо нашудааст.

Дар ҳамин ҳол, тибқи иттилои шабакаи иҷтимоии LinkedIn, як нафар бо ҳамин ном дар ширкати паҳнкунандаи маҳсулоти спиртӣ “Elida GROUP LLC” вазифаи сардори шуъбаи IT-ро ишғол мекард. Суол инҷост, ки Дадобоев чӣ гуна дар ин ширкат ба маълумоти дорои сирри давлатӣ даст ёфтааст?

Ин бори аввал нест, ки зодагони Тоҷикистонро дар Русия бо иттиҳоми хиёнат ба давлат барои солҳои тӯлонӣ равонаи зиндон мекунанд. Дар охирҳои соли 2023, Додгоҳи шаҳри Маскав Зоҳидов Аҳадҷон Маҳмадҷоновичи 36-соларо, ки дар пойтахти Русия ҳамчун ронандаи таксӣ ва устои “сантехник” кор мекард, бо иттиҳоми хиёнат ба давлат ва қочоқи силоҳ маҳкум ба 13 соли зиндони низомаш сангин карда буд.

Инчунин дар моҳи октябри соли 2023 мақомоти Русия як муҳоҷири 32-солаи тоҷикро бо номи Шарифҷон Тиллозода дар шаҳри Маскав бо иттиҳоми ҷосусӣ барои Украина дастгир карда буданд.

Бино ба иттилои расонаҳои русӣ, Шарифҷон Тиллозода, зодаи шаҳри Панҷакенти Тоҷикистон дар ҳудуди як қисми низомии баста боздошт шуда буд. Кормандони ин қисми низомӣ дар аввал гумон карданд, ки ӯ мардикор асту роҳашро гум кардааст, вале маълум шудааст, ки гӯё “ӯ акс гирифта, ба кураторҳои худ ба хориҷ мефиристодааст”.

10-уми октябри соли 2023 додгоҳи ноҳияи Лефортово дар мурофиае, ки пушти дарҳои баста ӯро бар асоси моддаи 275 Кодекси ҷиноятии Русия ба ҷосусӣ айбдор намуда, ба муддати ду моҳ, яъне то 10 декабри соли ҷорӣ ба ҳабси пешакӣ гирифта буд, аммо то ҳол аз сарнавишти баъдии ӯ хабаре нашр нашудааст.

Гуфта мешавад, пас аз ҷанги Русия ва Украина шумори нафароне, ки бо иттиҳоми хиёнат ба давлат ва ҷосусӣ дар Русия боздошт мешаванд бештар шудааст.

Танҳо дар нимсолаи аввали соли 2024 52 нафар бо иттиҳоми хиёнат ба давлат дар Русия зиндонӣ шудаанд, ки ин омор нисбат ба ҳамин давраи соли 2023 3,5 маротиба бештар аст. Инчунин дар шаш моҳи аввали соли ҷорӣ 18 нафар бо иттиҳоми ҷосусӣ маҳкум ба зиндон шудаанд, ки дар ҳамин давраи соли гузашта ҳамагӣ 2 нафар бо ин иттиҳом дастгир шуда буданд.

Додситонии кул: Ҷавонони тоҷик дар Русия ифротӣ мешаванд на дар Тоҷикистон

Аз ҷониби
AZDA.TV
-
0

Додситонии кулли кишвар бо изҳори нигаронӣ мегӯяд, шаҳрвандони Тоҷикистон ба Русия рафта, дар онҷо тундгаро ва ифротӣ мешаванд ва бо роҳи фиреб ба он гурӯҳҳо ҳамроҳ мешаванд.

Ин суханҳо рӯзи 29-уми октябри соли ҷорӣ дар як конфронси ҷумҳуриявие, ки бо ташаббуси Кумитаи дин, танзими анъана ва ҷашну маросими Тоҷикистон дар Китобхонаи миллӣ баргузор шуд, садо дод.

Тавре Китобхонаи миллии Тоҷикистон дар сомонаи расмии худ хабар медиҳад, нишасти мазкур зери унвони “Конститутсияи Ҷумҳурии Тоҷикистон – кафили таъмини ҳуқуқ ва озодиҳои шахсӣ” доир гашта, дар он намояндагони давлатӣ, намояндагони ташкилотҳои байналмиливу ҷамъиятӣ ва олимону коршиносон ширкат карданд.

Дар ин нишаст намояндаи Додситонии кулли Тоҷикистон Саъдулло Хоҷазода зимни суханронияш гуфта, ки Русия кишварест, ки роҳи муҳоҷирони кории шаҳрвандони Тоҷикистонро барои пайвастан ба гурӯҳҳои ифротӣ боз кардааст.

“Азия-Плюс” менависад, ки ин намояндаи Додситонии кулли кишвар гуфт, “аз Русия ҷалб кардани ҷавонон, бахусус онҳое, ки бо мақсади муҳоҷирати корӣ ба ин кишвар рафтаанд ва маърифти ҳуқуқияшон дар сатҳи паст қарор дорад, барои гуруҳҳои ифротӣ нисбатан осонтар аст.”

Ӯ ҳамчунин бо нигаронӣ иброз дошта, ки “Барои онҳо маблағи ночиз пардохт карда, имтиёзҳо ваъда медиҳанду бо фиребу найранг ҷавононро ифротгаро месозанд.”

Намояндаи Додситонии кулли Тоҷикистон дар нишаст ҳамчун роҳҳал пешниҳод карда, ки “бо баланд бардоштани маърифти ҳуқуқии шаҳрвандон метавонем пеши роҳи шомилшавии шаҳрвандонро ба гурӯҳҳои террористиву ифротӣ” ва созмонҳои ҷиноятӣ бигирем.

Дар ин конфронс бархе коршиносон назари Хоҷазодаро рад карда, гуфтаанд, ки Русия сабаби аслии шомилшавии ҷавонон ба гурӯҳҳои ифротӣ нест, балки бетаҷрибагӣ ва камсаводии худи онҳо низ сабаби асосии чунин корҳост.

Давоми як соли ахир дар ҷандин амалиёти террористӣ дар кишварҳои Эрон, Туркия, Русия ва Афғонистон омилони асосӣ шаҳрвандони Тоҷикистон гуфта шудаанд. Аз ҷумла, пас аз ҳамлаи маргбор ба “Крокус Сити Ҳолл” беш аз 10 шаҳрванди Тоҷикистон боздошт шуданд. Мақомоти Русия пас аз ин ҳодиса вазъи муҳоҷирони кории тоҷикро бисёр сахт карда, ҳазорҳо тоҷикистониро бо баҳонаҳои андак аз Русия ихроҷ карданд.

Дар ҳамин ҳол таҳлилгарон ва мунтақидони ҳукумати Эмомалӣ Раҳмон мегӯянд, маҳз фишорҳои зиёд болои диндорон дар Тоҷикистон, бастани мадрасаҳои исломӣ, манъи ҳиҷобу риш ва мамнуъ кардани ҷавонони то 18-сола аз рафтан ба масҷид сабаб шуда, ки ҷавонон ба гурӯҳҳои ифротӣ ҳамроҳ шаванд.

Тоҷикистону Ҳиндустон ҳамкориҳои худро густариш медиҳанд

Аз ҷониби
AZDA TV-2
-
0

Мақомоти олии Тоҷикистон ва Ҳиндустон бо имзои як санади расмӣ мехоҳанд ҳамкориҳои тиҷоратии худро густариш диҳанд.

Бино ба иттилои расмӣ, 29-уми октябри соли 2024 дар ҳошияи нахустин Форум ва Намоишгоҳи байналмилалии сармоягузории маъдан ва металлургия байни Вазорати саноат ва технологияҳои нави Тоҷикистон ва Корпоратсияи миллии саноати хурди Ҳиндустон як санади нави ҳамкорӣ имзо шуд.

Ин Ёддошти тафоҳумро аз ҷониби Тоҷикистон вазири саноат ва технологияҳои нави Тоҷикистон Шералӣ Кабир ва аз ҷониби Ҳиндустон Субҳрансу Секхар Ачарйа, раиси Корпоратсияи миллии саноати хурди Ҳиндустон имзо карданд.

Сафорати Ҳиндустон дар Тоҷикистон, ки дар бораи имзои ин санад хабар додааст, таъкид мекунад, ки ҳадаф аз имзои ин санадро ҷонибҳо тақвияти ҳамкорӣ дар бахши соҳибкории хурду миёна ва пешбурди ҳамкориҳо барои омӯзиш ва рушди малака унвон кардаанд.

Гуфта мешавад, нахустин Форум ва Намоишгоҳи байналмилалии сармоягузории маъдан ва металлургияи Тоҷикистон дирӯз, 29-уми октябри соли ҷорӣ дар шаҳри Душанбе ба кори худ оғоз карда, дар кори он намояндаҳои кишварҳои Осиёи Марказӣ, Покистону Ҳиндустон ва Эрону Арабистон ҳам иштирок кардаанд.

Ҳукумати Тоҷикистон ҳадаф аз баргузории ин чорабиниҳоро “саноатикунонии босуръати мамлакат, дастгирии рушди устувори саноат, таҷдид ва тавсеаи робитаҳои ҳамкории минтақавӣ, инчунин фаъолсозӣ, рушди ҳамкорӣ ва шарикӣ дар соҳаи саноат” унвон кардааст.

Аммо бархе коршиносон мегӯянд, Ҳукумати Тоҷикистон бо раҳбарии Эмомалӣ Раҳмони 72-сола аксари конҳои тилову нуқураи кишварро бо роҳҳои ғайриқонунӣ, гирифтани пора, ва ғайра дар ихтиёри хориҷиҳо ва бахусус чиниҳо додааст. Даромади асосӣ аз ин конҳо низ на баҷуи давлат, балки ба ҷайби бархе наздикону пайвандони худи раиси ҷумҳур, ки ин ҳама конҳоро ба гуфти худашон “сарпарастӣ” мекунанд, соҳиб мешаванд.

Ба гуфтаи бархе таҳлилгарон, дар Тоҷикистон садҳо соҳибкору тоҷири муваффақе вуҷуд дорад, ки мехоҳанд дар Тоҷикистон сармоягузорӣ карда, як гӯшаи ватани худро обод кунанд, аммо чун фасоди молӣ ва идораӣ дар тору пуди ин ҳукумат реша давондааст, бархе ҳукуматдорон ин дафъа ҳам мехоҳанд, ки конҳои дигарро бо чунин роҳҳои ғайриқонунӣ дар ихтиёри хориҷиҳо қарор диҳанд.

Боздошти зиёда 7 ҳазору 500 муллову фолбин

Аз ҷониби
AZDA TV-2
-
0

Аз оғози соли ҷорӣ то кунун мақомоти кишвар ҳазорҳо нафарро бо баҳонаҳои мухталиф дастгир кардаанд.

Дар ин бора имрӯз, 29-уми октябр Президенти Тоҷикистон зимни суханроние дар шаҳри Душанбе иттилоъ дод. раҳмон гуфт, маҳз бо супориши ӯ мақомоти кишвар зиёда аз 7 ҳазору 500 нафарро бо иттиҳоми муллову фолбин дастгир карданд.

Эмомалӣ мегӯяд, “бо супориши раҳбари давлат ва дар натиҷаи чораҳои аз ҷониби мақомоти корҳои дохилӣ амалигардида дар кишвар 1500 нафар шахсоне, ки ба сеҳру ҷоду ва фолбинӣ машғул буданд ва зиёда аз 5000 нафар муллоҳои чаласавод барои хурофотпарастӣ дастгир гардида, ба қайди мақомоти корҳои дохилӣ гузошта шудаанд.”

Ба навиштаи бархе корбарон, Эмомалӣ Раҳмон бо шахсан фармони боздошт ва муттаҳам кардани зиёда аз 5000 донишманди бахши улуми динӣ ба “чалласаводӣ” амалан мустақил будани ҳокимияти додгоҳии Тоҷикистонро зери суол бурдааст.

Ӯ чанд сол пеш низ зимни як суханронияш, ки аз тариқи шабакаҳои телевизионӣ нашр шуд, занони ҳиҷобпӯшу мардони диндори Тоҷикистонро “чалласавод”, “хурофотпараст” ва бесавод гуфта таҳқиру тавҳин карда буд.

Ин ҳам дар ҳолест, ки мақомоти Тоҷикистон тайи 10 соли ахир бо супориши худи Эмомалӣ Раҳмон фаъолияти тамоми мактабу мардрасаҳои диниро дар кишвар боз дошта, ироаи ҳамагуна таълимоти диниро низ бидуни иҷозатномаи расмӣ, ки дастрас кардани он коре бисёр душвор аст, манъ кардааст. Имрӯз ҳам бори дигар Эмомалӣ Раҳмон таъкид кард, ки мақомоти корҳои дохилӣ ва ғайра бояд пеши роҳи таълимоти ғайриқонунии диниро бигиранд.

Хатари ихроҷи як фаъоли тоҷик аз Олмон

Аз ҷониби
AZDA-TV
-
0

Ба як фаъоли тоҷик хатари истирдод аз Олмон ба Тоҷикистон ва шиканҷаву зиндон таҳдид мекунад.

Ҷунбиши Ислоҳот ва рушди Тоҷикистон бо нашри изҳороте хабар дод, ки мақомоти Олмон 28-уми октябри соли 2024, узви ин ҷунбиш Дилшод Эргашевро ба Додгоҳи маъмурии шахри Клеве бурда, ба ҳабс гирифтанд.

Додгоҳ бо вуҷуди дар ҳоли баррасӣ будани дархости паноҳандагии Эргашев қарор баровардааст, ки ӯ 5 ё 7-уми ноябри соли ҷорӣ аз Олмон ихроҷ шавад.

Гуфта мешавад, ин фаъоли тоҷик аз соли 2011 дар Олмон ба сар мебарад ва дар эътирозҳои осоишта алайҳи режими Эмомалӣ Раҳмон фаъолона ширкат кардааст.

Ҷунбиши ислоҳот ва рушди Тоҷикистон мегӯяд, ки дар ҳоли истирдод Эргашев дар Тоҷикистон бо зиндони тӯлонӣ ва бадрафторӣ рӯбарӯ хоҳад шуд.

Инчунин дар изҳороти ҷунбиш гуфта мешавад, ки Мутобиқи моддаи 3 Конвенсияи Аврупо оид ба ҳуқуқи инсон ва моддаи 33 Конвенсияи Женева оид ба мақоми гурезаҳо, истирдоди одамон ба кишваре, ки ҳаёт ё озодии онҳо зери хатар аст, манъ аст. Аммо бо вуҷуди ин уҳдадориҳои байнулмилалӣ, додгоҳи Олмон ҳукми ихроҷи ин фаъоли тоҷикро содир кардааст.

ҶИРТ аз ҳукумати Олмон ва ҷомеаи ҷаҳонӣ даъват кардааст, ки барои ҷилавгирӣ аз ихроҷи Эргашев ва ҳимоят аз ӯ чораҳои фаврӣ андешанд ва аз Amnesty International, Human Rights Watch ва дигар созмонҳои байналмилалӣ хостааст, ки ба мақомоти Олмон фишор оваранд, то уҳдадориҳои худ дар мавриди ҳимояи ҳуқуқи башарро риоят кунад.

Ёдовар мешавем, ки қаблан Ҷумҳурии Федеративии Олмон Абдуллоҳи Шамсиддин, писари узви баландпояи ҲНИТ Шамсиддин Саидов ва Билол Қурбоналиев, узви “Гурӯҳи 24”-ро ба Тоҷикистон ихроҷ карда буд, ки баъдан Абдуллоҳ ба 7 сол ва Билол ба 10 соли зиндон маҳкум шуданд.

Раҳмон: муҷозоту зиндонӣ кардан ба хотири “лайк” хотима дода шавад!

Аз ҷониби
Azda Tv
-
0

Эмомалӣ Раҳмон рӯзи 29-уми октябр зимни чорабиние дар шаҳри Душанбе эътироф кард, ки муҷозоти шаҳрвандон ба хотири “лайк” гузоштан зери муҳтавоҳо дар шабакаҳои иҷтимоӣ беасос аст.

Раҳмон ҳамзамон таъкид кард, ки беъзе намояндагони мақомоти ҳифзи ҳуқуқ барои “лайк” гузоштани шаҳрвандон зери маводҳо дар интернет бар алайҳи онҳо парвандаи ҷиноӣ боз мекунанд ва бояд ба ин амал хотима дода шавад. 

То куҷо ин фармони раисҷумуҳур амалӣ хоҳад шуд маълум нест, чун чунин фармонҳое дар гузашта дар чандин ҳолат аз забони Эмомалӣ садо додааст, вале иҷро нашудаанд. Аз ҷумла, дар моҳи сенятбр Раҳмон аз навъи пешвозгирӣ ва ҷалби кӯдакон дар ин кор интиқод кард ва супориш дода буд, ки ба ин кор хотима дода шавад. Аммо дар сафарҳои баъдии ӯ ҳеч тағйире ба амал наомад ва ҳамоно Раҳмону мансабдоронашро бо ҳамон шакли кӯҳна, бо ҷалби кӯдакон пешвоз мегиранд. 

Ҳамчунин чанд сол пеш дар мулоқоте ӯ гуфта буд, ки таърифу тавсифи худашро аз ҷониби мансабдорону шаҳрвандон зимни вохӯриҳо дӯст надорад ва аз чунин амалҳо эҳсоси нороҳтӣ мекунад. Чизе, ки тағйир накард ва баракси ҳоло бештару маъмулитар гашт. 

Раҳмон дар ҳоле муҷозот барои “лайк”-ро интиқод мекунад, ки садҳо ҷавон дар Тоҷкистон ба хотири “лайк” гузоштан зери матолиби интиқодӣ аз ҳукумат аз 5 то 10 сол ва ҳатто бештар аз он зиндонӣ шудаанд. Ҳоло маълум нест, ки пас аз гуфтаҳои Раисҷумуҳур нафарони зиндонишуда ба хотири “лайк”-у бознашр бегуноҳ дониста мешаванд ё хайр? 

Тоҷикситон борҳо аз сӯи созмонҳои ҷаҳонии ҳомии ҳуқуқ барои муҷозот намудани шаҳрвандон ба хотири “писандидану ба дигарон фиристодани наворҳо дар интернет” танқид шудааст.

Бояд гуфт, ки дар моҳи майи соли 2018 Алиҷон Шарипов ба далели тамошо, лайк мондан ва ба иштирок гузоштани наворҳои мухолифон, ба 9,5 сол зиндон маҳкум шуд. дар моҳи июли соли 2019 як шаҳрванди дигар ба номи Иброҳим Қосимов аз ноҳияи Панҷакент ба ҳамин далел ба 9.5 сол зиндон маҳкум шуд.

Ҳамзамон дар соли 2021 як манбаъ аз вилояти Хатлон, ки нахост номаш зикр шавад дар суҳбат бо “Аздо тв” гуфт, ки дар вақти дар Русия буданаш боре ба амри маъруфи Эшони Нуриддин ва Ҳоҷӣ Мирзо дар шабакаи иҷтимоии “Одноклассник” “класс” мондааст. Мақомот ӯро даъват карда, таҳдидаш кардаанд, ки агар 50 ҳазор сомонӣ наорад 5 сол зиндонӣ мешавад. Вале ӯ мегӯяд, бо миёнаравҳо тавонист бо 10 ҳазор сомонӣ худро халос карда, ба Русия баргардад.

Боздошти 437 нафар дар Тоҷикистон

Аз ҷониби
AZDA TV-2
-
0
На фото опиум. Сегодня, 21 декабря с целью ограждения общества от наркотических средств, предотвращения вовлечения молодежи в употребление наркотиков, в Агентстве по контролю за наркотиками при Президенте РТ (АКН) состоялась церемония сжигания наркотиков. В специальной печи АКН сожжено 368 кг. 271 гр. Наркотических средств, в том числе : 7кг. 984 гр. Героина, 110 кг. 910 гр опия, 111 кг. 425 гр. Гашиша, 136 кг. 700 гр. Наркотиков канабисной группы и 1 кг. 250 гр. Таблеток МДМА по 15 уголовным, по которым приговор суда вступил в законную силу. Наркотики были изъяты сотрудниками АКН, Госкомитета национальной безопасности и таможенной службы страны. За прошедшие 17 лет в печи АКН было сожжено более 17,5 тонн наркотиков.

Мақомоти Тоҷикистон мегӯянд, ки гардиши маводи мухаддир дар кишвар нисбат ба соли гузашта зиёдтар шудааст.

Эмомалӣ Раҳмон, раисҷумҳури Тоҷикистон 29-уми октябри соли ҷорӣ дар як суханронии худ дар шаҳри Душанбе гуфт, ки дар 9 моҳи соли ҷорӣ 437 нафар “героинфурӯш” боздошт шудааст.

Ба қавли Эмомалӣ Раҳмон, мақомоти Тоҷикистон инчунин дар давоми ин 9 моҳи гузашта зиёда аз 4 тонна маводи мухаддир, аз ҷумла 2 тоннаву 735 килограмм аз ҷониби кормандони Вазорати корҳои дохилӣ мусодира шудааст.

Президенти Тоҷикистон, ки дар маросими ифтитоҳи Муассисаи давлатии омодасозии кадрҳои баландихтисос суҳбат мекард, таъкид кард, ки мақомот инчунин 5 гурӯҳи муташаккили ҷиноятиро ошкор намуда, 15 аъзои ин гурӯҳҳо ба ҳабс гирифта шудаанд.

Пеш аз ин мақомоти Вазорати корҳои дохилӣ, КДАМ ва Агнетии мубориза бар зидди маводи мухаддир дар Тоҷикистон борҳо аз боздошти бархе кормандон ва мақомоти баландпояи кишвар дар гардиш, интиқол ва паҳн кардани маводи мухаддир хабар дода буданд.

Инчунин оморҳои расмӣ дар Тоҷикистон низ нишон медиҳанд, ки қочочиёни маводи мухаддир дар хеле аз мавридҳо бидуни ҳамкорӣ, ҳамоҳангӣ ва ё маслиҳатҳои пешакӣ бо бархе мақомоти баландпоя наметавонанд ба осонӣ фаъолият кунанд.

Эмомалӣ Раҳмон, ки бо нигаронӣ дар бораи афзоиши гардиши маводи мухаддир гап мезад, таъкид карда гуфт, “то ҳол дар ҷойҳои дилхушӣ ва ҷамъиятӣ фурӯши маводи мухаддири синтетикӣ ҷой дорад ва шумораи нашъамандон ҳанӯз зиёд мебошад.”

Гуфта мешавад, дар Тоҷикистон аксар марказҳои дилхӯшии шаҳру ноҳияҳои кишвар зери сояи бевоситаи афроди наздик ба хонаводаи раисҷумҳур ва дигар мақомоти баландпояи кишвар фаъолият мекунанд. Ва ба назар мерасад, ин хитоби Эмомалӣ Раҳмон пеш аз он ки ба дигарон таъаллуқ дошта бошад, ба фарзандону пайвандон ва дигар зердастони худи ӯ дар сафи мақомот дахл дорад.

Исроил фаъолияти Ожонси UNRWA-ро мамнуъ кард

Аз ҷониби
AZDA.TV
-
0

Парлумони Исроил (Кнессет) бо тасвиби қонуне фаъолияти Ожонси имдодрасонӣ ва корёбӣ ба оворагони фаластинии Созмони Миллали Муттаҳид (UNRWA)-ро мамнуъ мекунад.

Гуфта мешавад, 92 намояндаи парлумони Исроил ба тарафдории ин қонун ва 10 намоянда бар зидди он овоз додаанд. Ва дар ниҳоят қонун барои манъи фаъолияти UNRWA дар заминҳои ишғолии Фаластин қабул шуд.

Ожонси имдодрасонӣ ва корёбӣ ба оворагони фаластинии Созмони Миллали Муттаҳид аз соли 1967 дар Исроил фаъолият мекард. Ва ахиран Исроил иддао кард, ки фаъолияти созмони мазкурро дар заминҳои ишғолӣ манъ мекунад.

Тасвиби ин қонун аз ҷониби парлумони Исроил вокуниши хеле аз кишварҳоро ба бор овард. Аз ҷумла, Амрико, Австралия ва чанд кишвари дигар бо нашри изҳорот ин иқдоми Исроилро ба шиддат маҳкум карданд.

Вазорати корҳои хориҷии Туркия дар баёнияе эълом кард, ки талоши парлумони Исроил барои поён додан ба фаъолиятҳои Ожонси имдодрасонӣ ва корёбӣ ба оворагони фаластинии Созмони Миллали Муттаҳид дар Фаластини ишғолӣ нақзи ошкори қавонини байналмилалӣ аст.

ВКХ-и Туркия таъкид карда, ки фаъолиятҳои UNRWA аз соли 1949 ба миллионҳо паноҳандаи фаластинӣ кумаки ҳаётӣ карда, барои ҳифзи суботи минтақа низ аз аҳамияти болое бархӯрдор аст.

Ҳамзамон Созмони Миллали Муттаҳид аз “паёмадҳои фоҷеабор”-и қатъи фаъолиятҳои UNRWA ҳушдор дод. Антонио Гутерриш, Дабири кулли Созмони Милали Муттаҳид таъкид карда, ки “Иҷрои чунин мамнуияте метавонад паёмабдҳои фоҷеаборе барои овороагони фаластинӣ дар манотиқи ишғолӣ дошта бошад ва ин амр ғайри қобили қабул аст.”

Дар ҳамин ҳол Созмони байналмилалии муҳоҷират рӯзи сешанбе ба расонаҳо гуфта, ки агарчи бисёр мехоҳад ба онҳое, ки баъди қатъи фаъолияти UNRWA ба мушкилот рӯбарӯ мешаванд, кумак кунад, вале ба ҳар сурат наметавонад ҷойгоҳи ин созмонро пур кунад, “зеро мшкил аст”.

Ожонси имдодрасонӣ ва корёбӣ ба оворагони фаластинии Созмони Миллали Муттаҳид (UNRWA) пас аз ҳамлаҳои Исроил ба Ғазза ва мушкилоти сахти зиндагӣ дар ин минтақа ба аҳолӣ кумакҳои ғизоиро мерасонд.

Имзои Стратегияи ҳамкории СҶТ бо Тоҷикистон

Аз ҷониби
AZDA TV-2
-
0

Созмони ҷаҳонии тандурустӣ (СҶТ) нахустини Стратегияи ҳамкории худ бо Тоҷикистонро имзо кард.

Директори минтақавии Созмони ҷаҳонии тандурурсӣ дар Аврупо Ҳанс Клуг (Hans Kluge) дар саҳфаи Х-и худ хабар дод, ки санади мазкур рӯзи 28-уми октябри соли ҷорӣ зимни 74-умин ҷаласаи Кумитаи минтақавии Созмони ҷаҳонии тандурустӣ барои Аврупо ба имзо расид.

Ба қавли Ҳанс Клуг, ин санади муҳимро бо Ҷамолиддин Абдуллозода, вазири тандурустӣ ва ҳифзи иҷтимоии аҳолии Тоҷикистн имзо кардааст. Ӯ таъкид мекунад, ки имзои ин санад “як қадами бузург дар самти таҳкими ҳамкории Созмони ҷаҳонии тандурустӣ бо Тоҷикистон мебошад.”

Директори минтақавии Созмони ҷаҳонии тандурурсӣ дар Аврупо дар идома гуфтааст, “ин стратегияи ҳамкорӣ нишонаи эътимод аст, ки бо Стратегияи ҳифзи солимии аҳолии Тоҷикистон барои давраи то соли 2030 мутобиқат мекунад.”

Инчунин ин санад, ба авлавиятҳои асосии тандурустӣ, аз ҷумла таҳкими фарогирии ҳамагонии тандурустӣ (Universal Health Coverage (UHC)) ва хизматрасониҳои тиббии аввалиндараҷа (Primary Health Care (PHC)) равона шудааст.

Ҳанс Клуг ҳамчунин мегӯяд, уҳдадорем аз моделҳои навоваронаи хизматрасониҳои тиббии аввалиндараҷа, истифодаи беҳтари захираҳои молиявӣ ва ташаккули низоми иттилоотии пурқуввати тандурустӣ пуштибонӣ кунем.

Дидори сафирони Тоҷикистон ва Толибон

Аз ҷониби
AZDA TV-2
-
0

Сафирон фавқулъода ва мухтори Тоҷикистон ва Ҳукумати муваққати Толибон дар Афғонистон бо ҳам мулоқот карданд.

Бино ба иттилои расонаҳои Афғонистон, 27-уми октябри соли 2024 Ардашер Қодирӣ, сафири фавқулода ва мухтори Тоҷикистон дар Малайзия бо Нақибуллоҳ Аҳмадӣ, сафири Толибон дар Малайзия бо ҳам мулоқот кардааст.

Ба қавли манбаъ, дар ин чорабинӣ, ки бо пешниҳоди сафорати Афғонистон дар шаҳри Куала-Лумпури Малайзия сурат гирифтааст, сафирони дигар кишварҳои Осиёи Марказӣ ва Озарбойҷону Русия низ иштирок кардаанд.

Дар рафти ин мулоқот ҷонибҳо чанд акси хотиравии дастаҷамъӣ низ гирифта, дар шабакаҳои иҷтимоӣ нашр кардаанд. Дар яке аз ин аксҳо дида мешавад, ки Ардашер Қодирӣ, сафири Тоҷикистон дар паҳлӯи рости Нақибуллоҳ Аҳмадӣ ҳузур дорад.

Ду моҳи пеш низ хабару гузоришҳое дар расонаҳои дохилӣ ва хориҷӣ нашр шуда буд, ки Саймумин Ятимов, раиси Кумитаи давлатии амнияти миллии Тоҷикистон бо сафари расмӣ ба Кобул рафта, бо мақомоти Толибон мулоқот намуда, аз онҳо хостааст, ки чанд нафар аз гумоштаҳои боздоштшудаи амнияти Тоҷикистонро дар Афғонистон озод кунанд.

Пеш аз сафари Эмомалӣ Раҳмон ба Вилояти Мухтори Кӯҳистони Бадахшони Тоҷикистон, ки нимаи моҳи ҷорӣ сурат гирифта буд, хабару гузоришҳое ҳам нашр гардид, ки мақомоти Тоҷикистон аз Ҳукумати Толибон хоста буданд, то амнияти Эмомалӣ Раҳмонро аз он сӯи марзҳо таъмин кунанд.

Гуфта мешавад, ин ҳама мулоқотҳои расмӣ ва ғайрирасмии мақомоти Тоҷикистон бо намояндаҳои Ҳукумати муваққати Афғонистон бо роҳбарии Толибон дар дохил ва хориҷи ин кишвар дар ҳоле сурат мегиранд, ки Додгоҳи олии Тоҷикистон Таҳрики Толибони Афғонистонро як созмони террористӣ медонад ва ҳамагуна робитаҳои шаҳрвандони кишвар бо онҳоро манъ кардааст.

1...555657...675саҳифаи 56 аз 675

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
clear sky
21.1 ° C
21.1 °
21.1 °
40 %
2kmh
0 %
Sat
37 °
Sun
38 °
Mon
39 °
Tue
38 °
Wed
38 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст