Хона блог саҳифа 5

21 кушта ва 19 захмӣ: омори нигаронкунандаи садамаҳо дар корхонаҳои саноатии Тоҷикистон

Аз ҷониби
Azda TV 3
-
0

Дар шаш моҳи аввали соли ҷорӣ бар асари ҳодисаҳои нохуш дар корхонаҳои саноатӣ ва соҳаи кӯҳкории Тоҷикистон 21 нафар ҷон бохта, 19 нафари дигар захмӣ шудааст.

Дар ин бора намояндагони Хадамоти назорати давлатии бехатарии корҳо дар саноат ва соҳаи кӯҳкорӣ рӯзи 7-уми июл зимни нишасти матбуотӣ хабар доданд.

Ба гуфтаи мақомот, дар байни ҷонбохтагон ду шаҳрванди Чин ва як шаҳрванди Эрон низ ҳастанд. Ҳамчунин дар миёни маҷруҳон як шаҳрванди Русия ва як шаҳрванди Чин қарор доранд.

Мақомот сабаби асосии рух додани ин ҳодисаҳоро риоя нашудани талаботи бехатарии саноатӣ, бемасъулиятии кормандони муҳандисиву техникӣ ва норасоии мутахассисони соҳибихтисос унвон карданд.

Дар робита ба ин ҳодисаҳо нисбат ба ду корхона, 33 шахси мансабдор ва 13 шахси масъул чораҳои маъмурӣ андешида шуда, дар маҷмуъ ба маблағи 153 ҳазору 960 сомонӣ ҷарима таъйин шудааст.

Ба иттилои Хадамот, шумораи садамаҳои истеҳсолӣ дар муқоиса бо ҳамин давраи соли гузашта ҳашт ҳолат бештар шудааст.

Ҳодисаҳои маргбор дар корхонаҳои саноатӣ дар Тоҷикистон тайи солҳои охир борҳо боиси нигаронӣ шудаанд. Коршиносон аз риоя нашудани меъёрҳои бехатарӣ, истифодаи таҷҳизоти фарсуда ва норасоии назорати техникӣ ҳамчун омилҳои асосии афзоиши чунин садамаҳо ном мебаранд. Дар гузашта низ бархе аз коргарон ва наздикони онҳо аз беэътиноӣ ба қоидаҳои бехатарӣ ва назорати нокифоя дар баъзе корхонаҳо шикоят карда буданд.

Аломатгузории марзи Тоҷикистону Қирғизистон дар вилояти Суғд пурра анҷом ёфт

Аз ҷониби
Azda TV 3
-
0

Мақомоти вилояти Суғд мегӯянд, корҳои таъйин ва аломатгузории марзи давлатии Тоҷикистон бо Қирғизистон дар ҳудуди ин вилоят пурра ба анҷом расидааст.

Ба иттилои дафтари матбуоти раиси вилояти Суғд, дар маросими анҷоми корҳои аломатгузорӣ Раҷаб Аҳмадзода, раиси вилояти Суғд, ҳамроҳ бо намояндагони Нерӯҳои марзбонии Кумитаи давлатии амнияти миллӣ ва Вазорати мудофиаи Тоҷикистон иштирок кардааст.

Корҳои таъйин ва аломатгузории марз пас аз он анҷом ёфтанд, ки моҳи марти соли 2025 раҳбарони Тоҷикистону Қирғизистон Созишнома дар бораи марзи давлатии ду кишварро ба имзо расонданд. Бо ин созиш, баҳси чандинсолаи марзӣ, ки тайи даҳсолаҳо ҳал нашуда буд, расман ба поён расид.

Ҳарчанд мақомоти Тоҷикистон ҷузъиёти созишномаро пурра нашр накардаанд, бархе масъулони Қирғизистон пештар гуфта буданд, ки ҷонибҳо дар доираи созиш ба мубодилаи қисме аз роҳҳо ва чанд маҳалли аҳолинишин мувофиқат кардаанд.

Дарозии умумии марзи Тоҷикистону Қирғизистон 1006 километрро ташкил медиҳад. То имзои созишнома қисми зиёди ин марз баҳсӣ маҳсуб мешуд ва дар тӯли солҳои охир борҳо ба даргириҳои мусаллаҳона миёни сокинон ва нерӯҳои марзбонии ду кишвар сабаб гардида буд.

Ёдовар мешавем,ки Охирин муноқишаи  марзӣ моҳи сентябри соли 2022 рух дод, ки дар натиҷаи он аз ҳар ду ҷониб даҳҳо нафар кушта ва захмӣ шуданд. Тибқи маълумоти расмӣ, танҳо аз ҷониби Тоҷикистон беш аз 250 нафар кушта ва ё захмӣ гардида буданд.

Музокироти ниҳоӣ оид ба ҳалли баҳсҳои марзӣ моҳи декабри соли 2024 дар шаҳри Бодканди Қирғизистон баргузор шуда, баъд аз он роҳбарони ҳайатҳои музокиракунанда эълон карданд, ки тамоми масъалаҳои баҳсӣ миёни ду кишвар ҳал шудаанд.

Дар доираи созиш, ҷонибҳо инчунин тақрибан 190 гектар заминро аз ҳар тараф бо ҳам мубодила карданд.

Ба иттилои мақомоти Қирғизистон, пас аз ҳалли баҳси марзӣ дар қаламрави ин кишвар 143 километр роҳҳои мошингард сохта шуда, дар беш аз 107 километр марз сутунҳои бетонӣ, симҳои хордор, деворҳои муҳофизатӣ ва дигар инфрасохтори марзӣ насб шудааст.

Мақомот умедворанд, ки анҷоми пурраи аломатгузории марз барои таҳкими амният, густариши ҳамкориҳои дуҷониба ва пешгирии муноқишаҳои оянда дар минтақаҳои наздисарҳадӣ замина фароҳам меорад.

Нишасти НАТО дар Анқара: Трамп бо раҳбарони 32 кишвар мулоқот мекунад

Аз ҷониби
Azda TV 3
-
0

Президенти Иёлоти Муттаҳидаи Амрико Доналд Трамп барои иштирок дар нишасти дурӯзаи сарони кишварҳои узви Созмони Паймони Атлантикаи Шимолӣ (НАТО), ки рӯзҳои 7-ум ва 8-уми июл дар шаҳри Анқараи Туркия баргузор мешавад, вориди ин кишвар шуд.

Дар нишаст раҳбарони 32 кишвари узви НАТО масъалаҳои муҳими амнияти байналмилалӣ, аз ҷумла ҷанги Русия ва Украина, афзоиши хароҷоти дифоӣ, рушди саноати ҳарбӣ ва таҳкими ҳамкориҳои низомиро баррасӣ мекунанд.

Яке аз мавзуъҳои асосии музокирот талаботи Вашингтон аз шарикони аврупоӣ барои зиёд кардани саҳми онҳо дар хароҷоти мудофиа мебошад. Доналд Трамп борҳо таъкид кардааст, ки кишварҳои аврупоӣ бояд масъулияти бештари таъмини амнияти худро ба дӯш гиранд. Дар остонаи нишаст мақомоти НАТО хабар доданд, ки кишварҳои аврупоӣ ва Канада соли гузашта хароҷоти дифоии худро ба таври назаррас афзоиш додаанд.

Интизор меравад, ки дар ҳошияи нишаст Доналд Трамп бо президенти Туркия Раҷаб Тайиб Эрдуғон ва инчунин бо чандин роҳбари дигари кишварҳои узви НАТО мулоқот анҷом диҳад. Аз ҷумла, масъалаҳои марбут ба идомаи кумакҳои низомӣ ба Украина, ҳамкориҳои мудофиавӣ ва вазъи амниятӣ дар Ховари Миёна низ дар маркази гуфтугӯҳо қарор хоҳанд гирифт.

НАТО инчунин тасмим дорад дар ин нишаст бастаи нави кумакҳои ҳарбӣ ба Украинаро баррасӣ намуда, бар идомаи пуштибонии худ аз Киев таъкид кунад. Ҳамзамон, сарони кишварҳо масъалаи сармоягузории бештар ба саноати мудофиа ва истеҳсоли таҷҳизоти низомиро низ муҳокима хоҳанд кард.

Ин нишаст дар ҳоле баргузор мешавад, ки таҳаввулоти ҷанги Украина, муносибатҳои кишварҳои узви НАТО ва масъалаи тақсими масъулияти дифоӣ ба яке аз мавзуъҳои калидии сиёсати байналмилалӣ табдил ёфтааст.

Вазорат бояд унвон диҳад ё ҳунарманд онро биталбад? Унвони “Ғарибшоҳ” баҳсбарангез шуд

Аз ҷониби
Azda TV 3
-
0

Вазорати фарҳанги Тоҷикистон дар нишасти матбуотии худ ба баҳсҳое, ки пас аз даргузашти Бахтиёр Раҳимов, роҳбари гурӯҳи ҳаҷвии «Ғарибшо кампания», дар бораи надоштани унвони давлатӣ ба миён омада буданд, посух дод.

Бахтиёр Раҳимов, ҳунарманди маъруфи тоҷик ва роҳбари гурӯҳи ҳаҷвии «Ғарибшоҳ кампания», шаби 30-уми июн дар синни 57-солагӣ даргузашт. Пас аз марги ӯ дар шабакаҳои иҷтимоӣ ва расонаҳо баҳсу интиқодҳо матраҳ шуданд, ки чаро яке аз маъруфтарин ҳаҷвнигорони кишвар соҳиби унвонҳои давлатӣ набуд.

Матлубахон Сатториён, вазири фарҳанг, дар нишасти матбуотӣ бо изҳори ҳамдардӣ ба пайвандони марҳум гуфт, ки барои соҳиб шудани ҳунармандон ба унвонҳои давлатӣ маҳдудияти алоҳидае нисбат ба ҳаҷвнигорон вуҷуд надорад. Ба гуфтаи ӯ, Бахтиёр Раҳимов соҳиби унвони «Аълочии фарҳанги Ҷумҳурии Тоҷикистон» буд.

Абдуфаттоҳ Аминзода, сардори Раёсати рушди муассисаҳои фарҳангӣ ва ҳунарҳои мардумии вазорат, гуфт, тибқи тартиби амалкунанда, пешниҳод барои дарёфти унвонҳои давлатӣ аз ҷониби муассисаи кории ҳунарманд ё мақомоти иҷроияи маҳаллии ҳокимияти давлатӣ анҷом дода мешавад.

Ба гуфтаи ӯ, Бахтиёр Раҳимов дар ягон муассисаи тобеи Вазорати фарҳанг фаъолият намекард ва то замони даргузашташ ҳуҷҷатҳои пешниҳодии ӯ барои дарёфти унвони давлатӣ ба вазорат ворид нашуда буданд.

Аминзода ҳамчунин изҳор дошт, ки соли гузашта бо ибтикори Вазорати фарҳанг бо Бахтиёр Раҳимов тамос гирифта шуда, ба ӯ пешниҳод шудааст, ки ҳуҷҷатҳои заруриро барои баррасии масъалаи дарёфти унвони давлатӣ омода кунад. Ба гуфтаи ӯ, Раҳимов он замон бинобар табобат натавонистааст ҳуҷҷатҳоро пешниҳод кунад.

Аммо ин изҳороти намояндаи Вазорати фарҳанг аз ҷониби Ташриф Халилов, ҳамкори наздик ва дӯсти Бахтиёр Раҳимов, зуд рад карда шуд. Халилов дар саҳифаи Instagram-и худ навишт, ки «ягон бор акаи Бахтиёрро аз Вазорати фарҳанг занг назадаанд.»

Ба гуфтаи ӯ, Бахтиёр Раҳимов солҳои зиёд орзуи гирифтани як унвони расмиро дошт ва борҳо пешниҳод мекард, ки барои дарёфти он ба Дастгоҳи иҷроияи Президенти Тоҷикистон муроҷиат кунад. Халилов менависад, ки агар аз Вазорати фарҳанг воқеан занг мезаданд, Раҳимов ҳатман аз ин хабар ба ӯ мегуфт ва фавран барои омода кардани ҳуҷҷатҳо иқдом мекард.

Ӯ дар навиштааш таъкид кардааст: «Агар Вазорати фарҳанг занг мезад, давида-давида мерафт. Мо ҳар рӯз якҷо будем. Агар чунин занг мешуд, ҳатман мегуфт, ки аз вазорат як хушхабар расид. Барои ҳамин, ҳақиқат ин аст, ки ягон бор занг назадаанд.»

Орзу Исоев, рӯзноманигори собиқи телевизиони давлатии «Сафина», ки қаблан бо Бахтиёр Раҳимов чандин мусоҳиба анҷом додааст, дар бораи тартиби пешниҳоди ҳуҷҷат барои гирифтани унвонҳо интиқод карда, навиштааст: «Аҷаб! Чӣ тавр ариза менавишта бошӣ? “Илтимос, аз шумо хоҳиш мекунам, ки ба ман унвон диҳед!” Ҳамин хел? Ин чӣ унвонест, ки онро гадовор бояд биталбӣ? Магар табиати ҳунарманд бо ин қабил шарту қоида созгор аст?»

Ба гуфтаи ӯ, унвонҳои давлатӣ бояд бо ибтикори мақомоти масъул ва ҳамчун қадрдонии ногаҳонӣ ба ҳунармандони арзанда дода шаванд, на ин ки худи ҳунарманд барои дарёфти онҳо муроҷиат кунад.

Изҳороти Вазорати фарҳанг дар ин маврид баҳсҳои зиёдеро дар шабакаҳои иҷтимоӣ ба вуҷуд овардаст. Бисёре аз корбарон бар ин назаранд, ки Бахтиёр Раҳимов, ҳатто бидуни доштани унвони давлатӣ, аллакай ҳунарманди мардумӣ дар қалби мардум буд. Бархеи дигар аз муносибати мақомоти фарҳангӣ интиқод карда, пешниҳод доранд, ки ба хотири қадршиносӣ аз саҳми ӯ дар рушди ҳаҷви тоҷик, пас аз даргузашташ низ бо унвони фахрии давлатӣ сарфароз карда шавад.

Акнун “баҳонаҳо” барои ихроҷи муҳоҷирон аз Русия боз ҳам бештар мешавад

Аз ҷониби
AZDA-TV
-
0

Вакилони рус дар ҳамин ҳафта лоиҳаи қонунеро баррасӣ мекунанд, ки васеъ намудани рӯйхати асосҳои ихроҷи шаҳрвандони хориҷӣ ва муҳоҷиронро аз кишвар пешбинӣ мекунад.

Раиси Думаи давлатии Федератсияи Русия Вячеслав Володин дар “Telegram”-и худ хабар додааст, ки дар аввал пешниҳод шуда буд, ки ин рӯйхат аз 22 то 43 модда зиёд карда шавад, аммо баъди ворид шудани тағйиру иловаҳо шумораи моддаҳое, ки ихроҷи муҳоҷиронро ҳамчун ҷазо пешбинӣ мекунанд ба 45 мерасад.

Тибқи ин лоиҳа, ба рӯйхати асосҳои ихроҷ ҳуқуқвайронкунии марбут ба табъиз, яъне поймол кардани ҳуқуқ, озодиҳо ва манфиатҳои қонунии инсон вобаста ба ҷинс, нажод, ранги пӯст, миллат, забон, синну сол ё муносибат ба дин илова мешавад.

Ҳамчунин пешниҳод шудааст, ки барои итоат накардан ба амру фармони қонунии нерӯи низомӣ ҳангоми иҷрои вазифаҳои ӯ барои ҳифзи сарҳади давлатии Русия низ шаҳрвандони хориҷӣ ихроҷ карда шаванд.

Дар баробаробари ин муҳоҷиронро аз Русия барои вайрон кардани тартиботи ҷамъиятӣ, итоат накардан ба талаботи кормандони пулис ё Росгвардия, монеъ шудан ба кори нақлиёт ва инфрасохтор, барои паҳн кардани маводҳои “таҳқиркунандаи ахлоқи ҷамъиятӣ” дар интернет, инчунин ҳар гуна амалҳои оммавие, ки ҳамчун бадномкунии артиши Русия ё даъват ба ҷорӣ кардани таҳримҳо бар зидди ин кишвар арзёбӣ мешаванд, ихроҷ мекунанд ва лоиҳаи қонун барои чандин ҳуқуқвайронкуниҳо ҷаримаҳои гаронтарро пешбинӣ мекунад.

Володин мегӯяд, қабули ин тағйиру иловаҳо ба “баланд бардоштани амнияти ҷамъиятӣ ва барқарор намудани тартибот дар соҳаи муҳоҷират” равона шудааст.

Дар ҳоле вакилони рус мехоҳанд рӯйхати “баҳонаҳо” барои ихроҷи муҳоҷиронро бештар кунанд, ки танҳо Вазорати корҳои дохилии Русия дар соли 2025 аз ин кишвар 72 000 муҳоҷирро, ки гӯё қонунгузории Русияро вайрон карда буданд, ихроҷ кардааст.

Садамаи маргбор дар Фархор: чанд нафар ҷон бохт

Аз ҷониби
Azda TV 3
-
0

Дар садамаи вазнини нақлиётӣ, ки рӯзи 4-уми июл дар роҳи Фархор – Душанбе, дар ҳудуди деҳаи Бобосафои ноҳияи Фархор рух дод. Дар натиҷа 7 нафар ҷон бохта, як нафари дигар ҷароҳат бардоштааст.

Тибқи иттилои Радиои Озодӣ, қурбониёни ин ҳодиса аз 18 то 45-сола буда, рӯзи 5-уми июл ба хок супурда шудаанд. Ба гуфтаи намояндагони ҳукумати ноҳияи Фархор, садама дар қитъаи роҳе рух додааст, ки чанде пеш мумфарш шудааст ва бархе ронандагон дар он бо суръати баланд ҳаракат мекунанд.

Вазорати корҳои дохилии Тоҷикистон пештар дар бораи ин ҳодиса хабар дода, гуфта буд, ки Муҳаммад Идрисзодаи 19-сола, ронандаи автомашинаи тамғаи «Ҳундай Сервис», аз уҳдаи идораи мошин набаромада, ба мошини «Тойота Королла», таҳти идораи Оятулло Турсунови 34-сола бархӯрдааст.

Вазорати корҳои дохилӣ дар аввал аз ҳалокати 6 нафар хабар дода буд. Аммо тибқи маълумоти дарёфтшуда аз манобеи маҳаллӣ, шумораи қурбониён ба 7 нафар расидааст. Дар миёни онҳо Дилрабо Абдураҳмонова (45-сола), Товус Абдулазизова (45-сола), Сайлигул Шовалиева (41-сола), Оятулло Турсунов (34-сола), Муҳаммадҷон Идрисзода (19-сола), Ҷанатулло Фармонов (19-сола) ва Мавлуда Қосимова (18-сола) ҳастанд. Чаҳор нафар аз ҳалокшудагон зан мебошанд.

Яке аз наздикони Оятулло Турсунов гуфтааст, ки ӯ беш аз даҳ сол дар хатсайри Душанбе – Фархор ҳамчун ронандаи таксӣ фаъолият мекард.

Мақомоти корҳои дохилӣ то ҳол натиҷаи ниҳоии таҳқиқро эълон накардаанд. Як манбаъ аз Шуъбаи корҳои дохилии ноҳияи Фархор гуфтааст, ки мутахассисон мунтазири натиҷаи ташхиси техникӣ ҳастанд, аммо тибқи маълумоти пешакӣ, суръати баланд яке аз сабабҳои эҳтимолии садама арзёбӣ мешавад.

Ин дувумин садамаи пурқурбонӣ дар Тоҷикистон дар давоми як ҳафтаи охир аст. Рӯзи 2-юми июл низ дар як садама дар шаҳри Ваҳдат 11 нафар ҷон бохтанд. Ба иттилои Вазорати корҳои дохилӣ, дар он ҳодиса як мошини боркаш бо сабаби аз кор мондани низоми тормоз аввал ба автомашинаи «Опел Зафира» ва сипас ба «Тойота Прадо» бархӯрда буд.

Тибқи омори расмӣ, дар соли 2025 дар Тоҷикистон наздики 1400 садамаи нақлиётӣ ба қайд гирифта шуда, дар натиҷаи онҳо 643 нафар ҷон бохта ва беш аз 1500 каси дигар ҷароҳат бардоштаанд.

Коршиносон ва мақомоти масъул суръати баланд, риоя накардани қоидаҳои ҳаракат, истифодаи мошинҳои фарсуда, вазъи баъзе роҳҳо ва камбудиҳо дар омодасозии ронандагонро аз ҷумлаи омилҳои асосии зиёд будани садамаҳои нақлиётӣ дар кишвар медонанд.

Ҷоми ҷаҳонии 2026: Бразилия ҳам аз мусобиқа хориҷ шуд, Норвегия таърих сохт

Аз ҷониби
Azda TV 3
-
0

Марҳилаи 1/8-ниҳоии Ҷоми ҷаҳонии футбол-2026 бо идомаи натиҷаҳои ғайричашмдошт идома дорад. Пас аз хориҷ шудани Олмон ва Нидерланд дар даври қаблӣ, акнун яке аз муддаиёни асосии қаҳрамонӣ — Бразилия низ аз идомаи мусобиқа канор рафт.

Дастаи мунтахаби Норвегия шаби 5-уми июл Бразилияро бо ҳисоби 2:1 шикаст дода, бори аввал дар таърихи худ ба даври чорякниҳоӣ роҳ ёфт. Қаҳрамони вохӯрӣ Эрлинг Ҳоланн буд, ки ҳар ду голи тими худро ба самар расонд. Неймар танҳо дар дақиқаҳои иловагӣ аз пеналтӣ як гол ҷавоб дод, аммо ин барои наҷоти Бразилия кофӣ набуд.

Дар дигар бозии рӯзи 5-уми июл Англия дар як рақобати пуршиддат бо ҳисоби 3:2 бар Мексика ғалаба карда, роҳхати даври чорякниҳоиро ба даст овард. Ҷуд Беллингем бо ду гол нақши ҳалкунанда бозид.

Пеш аз ин, Фаронса бо голи Килиан Мбаппе аз пеналтӣ Парагвайро бо ҳисоби 1:0 мағлуб карда, ба чорякниҳоӣ баромад. Марокаш низ бо пирӯзии қотеонаи 3:0 бар Канада роҳхат гирифт.

Имрӯз, 6-уми июл, боз ду рақобати ҷолиби даври 1/8-ниҳоӣ баргузор мешаванд: Португалия — Испания (Даллас) ва Иёлоти Муттаҳида — Белгия (Сиэтл).

Рӯзи 7-уми июл бошад, Аргентина бо Миср ва Швейтсария бо Колумбия барои ду роҳхати охирини чорякниҳоӣ мубориза мебаранд.

То ин дам чор даста аллакай ба даври чорякниҳоӣ роҳ ёфтаанд: Марокаш, Фаронса, Норвегия ва Англия. Ғалабаи Норвегия бар Бразилия бузургтарин сюрпризи марҳилаи плей-офф то имрӯз арзёбӣ мешавад.

Гуфтугӯи Трамп бо Путин ва Зеленский

Аз ҷониби
Azda TV 3
-
0

Президенти Иёлоти Муттаҳидаи Амрико Доналд Трамп рӯзи 4-уми июл бо президенти Украина Владимир Зеленский ва президенти Русия Владимир Путин ба таври ҷудогона суҳбатҳои телефонӣ анҷом дод. Ин гуфтугӯҳо дар арафаи нишасти аъзои НАТО, ки рӯзҳои 7–8-уми июл дар Анқара баргузор мешавад, сурат гирифтааст.

Пас аз анҷоми суҳбат, Владимир Зеленский дар саҳифаи расмии худ изҳор дошт, ки бо Доналд Трамп “гуфтугӯи бисёр хуб” анҷом додааст. Ӯ аз пуштибонии Иёлоти Муттаҳида ба истиқлолият ва соҳибихтиёрии Украина изҳори сипос намуда, гуфт, ки ду ҷониб масъалаи хатми ҷанг ва вазъияти ҷабҳаҳоро баррасӣ кардаанд. Ба гуфтаи Зеленский, онҳо ҳамчунин ба мувофиқа расидаанд, ки музокиротро зимни нишасти НАТО дар Анқара идома диҳанд.

Аз ҷониби Русия, ёвари президенти ин кишвар Юрий Ушаков гуфт, ки гуфтугӯи Трамп ва Путин тақрибан 85–90 дақиқа идома карда, масъалаҳои ҷанги Украина, инчунин нишасти дарпешистодаи НАТО ва дигар масъалаҳои байналмилалиро фаро гирифтааст. Ба гуфтаи Кремл, Трамп омодагии худро барои мусоидат ба ҳарчи зудтар қатъ гардидани амалиёти ҷангӣ ва ҷустуҷӯи роҳи ҳалли сиёсӣ бори дигар таъкид кардааст.

Ба иттилои расонаҳои байналмилалӣ, Доналд Трамп қарор аст дар ҳошияи нишасти НАТО дар Анқара бо Владимир Зеленский мулоқоти рӯбарӯ анҷом диҳад. Ин мулоқот ба талошҳои дипломатӣ барои пайдо кардани роҳи поён бахшидан ба ҷанги Украина бахшида хоҳад шуд. Ҳамзамон эҳтимол меравад пас аз ин мулоқот Трамп боз бо Владимир Путин низ тамоси телефонӣ дошта бошад.

Фаъоли Бадахшон Абру Алимардоншоев: Авф набояд интихобӣ бошад

Аз ҷониби
Azda TV 3
-
0

Фаъоли ҷомеаи шаҳрвандии Бадахшон Абру Алимардоншоев аз равиши татбиқи қонуни авф, ки ба муносибати 35-солагии Истиқлоли давлатии Тоҷикистон қабул шудааст, нигаронӣ кард.

Ӯ дар саҳифаи фейсбукии худ навиштааст, ки озод шудани беш аз 11 ҳазор маҳкумшуда ва кам шудани муҳлати ҷазои ҳазорон нафари дигар боиси хушҳолии ҳазорон оила шудааст. Тибқи маълумоти нашршуда, қонуни авф барои озод ё сабуктар шудани ҷазои беш аз 18 ҳазор нафар пешбинӣ шудааст.

Ба гуфтаи Алимардоншоев, татбиқи қонун нисбат ба маҳкумшудагони парвандаҳои марбут ба рӯйдодҳои ВМКБ саволҳоро ба миён овардааст. Ӯ бо истинод ба маълумоте, ки дар ихтиёр дорад, мегӯяд, аз миёни тақрибан 300 маҳкумшудаи ин парвандаҳо танҳо ду нафар озод шудаанд. Ба гуфтаи ӯ, яке аз онҳо Муҳаммадсултон Мавлоназаров мебошад, аммо шахсияти нафари дуюм то ҳол маълум нест.

Ҳамчунин ба навиштаи ӯ, муҳлати ҷазои се маҳкумшудаи дигар — Улфатхоним Мамадшоева, Рамзӣ Вазирбеков ва Хушом Ҷумаев кам карда шудааст.

Алимардоншоев ҳамчунин таъкид мекунад, ки баъзе ниҳодҳои байналмилалии ҳифзи ҳуқуқ ва сохторҳои вобаста ба Созмони Милали Муттаҳид қаблан нисбат ба баъзе парвандаҳои марбут ба фаъолони ҷомеаи шаҳрвандӣ изҳори назар карда буданд. Аз ҷумла, нисбат ба парвандаҳои бархе фаъолони ҷомеаи шаҳрвандӣ тавсияҳо дар бораи бознигарӣ ва масъалаҳои вобаста ба ҳуқуқи онҳо пешниҳод шуда буданд.

Ба андешаи ӯ, агар ҳадафи қонуни авф воқеан бар пояи принсипҳои инсондӯстӣ амалӣ шавад, татбиқи он бояд нисбат ба ҳамаи шаҳрвандон баробар сурат гирад.

Инчунин Алимардоншоев гуфтааст, ки садҳо оилаи маҳкумшудагони парвандаҳои марбут ба ВМКБ то ҳол мунтазири бозгашти наздикони худ ҳастанд ва изҳори умед кардааст, ки ҳамаи боздоштшудагоне, ки беасос маҳкум шудаанд, рӯзе ба назди хонаводаҳои худ бармегарданд.

Боздошти як шаҳрванди Тоҷикистон дар Исроил бо иттиҳоми ҷосусӣ ба нафъи Эрон

Аз ҷониби
AZDA-TV
-
0

Пулис ва Хадамоти амниятии Исроил як шаҳрвандии Тоҷикистону Русияро бо гумони ҷосусӣ ба нафъи Эрон боздошт кардаанд.

Хадамоти амниятии Исроил рӯзи 2-уми июл хабар дод, ки Беҳрӯз Собирҷон бо ин иттиҳом охирҳои моҳи июни соли ҷорӣ дастгир шудааст.

Ба иддаои мақомоти исроилӣ, ӯ аз моҳи январ бо намояндаи Хадамоти ҷосусии Эрон дар тамос буда, ба ӯ аксҳо ва наворҳо аз маконҳои бархӯрди мушакҳоро фиристода, дар бораи чанд макони муҳими Исроил маълумот додааст ва талош кардааст ҷосусони навро ҷалб намояд.

Дар иттилоияи мақомоти Исроил зикр шудааст, ки гӯё Беҳрӯз Собирҷон дар давраи даргириҳои низомӣ байни Исроил ва Эрон, ки бо ҳамлаи Исроил ва ИМА ба Эрон дар 28-уми феврал оғоз шуд, ба ҷониби Эрон фаъолона иттилоъ интиқол медодааст.

Мақомоти исроилӣ инчунин иддао доранд, ки гумонбар дар ибтидо як пешниҳоди оддӣ гирифта буд, аммо баъд аз он ки фаҳмид бо намояндаи Хадамоти ҷосусии Эрон дар тамос аст, ҳамкориашро қатъ накард.

То ҳол назари Беҳрӯз Собирҷон ва наздиконаш ба ин иттиҳом маълум нест. Мақомоти Тоҷикистон ҳам дар ин бора чизе нагуфтаанд.

1...456...930саҳифаи 5 аз 930