Як ҷавони муҳоҷири тоҷикро дар Русия барои нашри наворҳои эътирозӣ сафорати Тоҷикистон дар Маскав бозпурсӣ кардааст. Ин ҷавон иддао дорад, ки дирӯз ӯро масъулони сафорат ба бинои сафоратхонаи Тоҷикистон дар Маскав даъват карда, пас аз пурсуҷӯҳои зиёд, ки ба гуфтаи ӯ се соат давом кардааст, телфони дастиашро гирифта барнагардондаанд.

Ба гуфтаи ҷавон дар сафорат аз ӯ пурсидаанд, ки бо нашри навори эътирозӣ чӣ гуфтан мехоҳад, ӯ дар посух гуфта, ки мехоҳад аз ҳаққи худ дифоъ кунад, мисли мондани риш ва ғайра, инчунин озодии Маҳмурод Одинаевро низ талаб дорад.

Ин ҷавон Аҳлиддин ном дошта, пештар дар наворе озодии Маҳмурод Одинаверо талаб кард, ки онро шабакаи ютубии “Уфуқ тв” нашр кард. Худи ӯ мегӯяд, ҳамин наворҳо боис шуда, ки сафорат ӯро даъват кунад.

Дирӯз аз ӯ талаб кардаанд, ки маълумотномаи тиббӣ дар бораи ташхиси коронавирус гирфта фардо бори дигар ба сафорат ҳозир шавад. Ба қавли ин муҳоҷири тоҷик, эҳтимол мехоҳанд ӯро ба Тоҷикистон бифиристанд.

Бояд гуфт, ки қаблан шабакаи “Уфуқ тв” дар Ютуб пас аз овозаҳо дар бораи боздошт шудани рӯзноманигор Абдусаттор Пирмуҳаммадзода маъракаи дифоъ аз ин журналистро ба роҳ монд, ки муҳоҷирони зиёд бо ирсоли навор ба ин шабака аз ӯ ҳимоят карданд.

Дертар ҳамин корро барои дифоъ аз Маҳмурод Одинаев оғоз карданд. Одинаев пас аз додани ариза барои гирдиҳамоӣ дар маркази Душанбе 20-уми октябр бедарак шуд ва дертар мақомот гуфтанд, ӯро боздошт кардаанд.

Ин ҷавони муҳоҷир бо ирсоли наворе озодии Одинаевро хоста буд. Ба қавли масъулони шабакаи “Уфуқ тв” айни замон ҷавон дар бинои сафорат қарор дорад ва аз ин хотир тамос бо ӯ қатъ шудааст. Назари масъулони сафортаи Тоҷикистон дар Маскав дар ин бора дастрас нашудааст.

Банкоматҳои марказии вилояти Хатлон чанд рӯз мешавад маблағи нақд надоранд, ин бепулии банкоматҳо сокинони ин минтақаро нигарон кардааст. Масъулин низ холӣ будани банкоматҳо аз пули нақдро тасдиқ карданд.

Бино ба иттилои сомонаи “Фараж” чанд рӯзи охир, аниқтараш аз 5- то 7-уми декабри соли равон дар аксарияти банкоматҳои маркази маъмурии вилояти Хатлон – шаҳри Бохтар маблағ надоштаанд, ки ин мардумро саргардон кардааст.

Даҳҳо сокини ин минтақа гуфтаанд, аз рӯзи ҷумъа то рӯзи душанбе,   банкоматҳои “Амонатбонк” маблағ надоштанд. Танҳо рӯзи сешанбе масъулони “Амонатбонк” дар ду-се банкомат пул гузоштанд.

Дар ҳамн ҳол як масъули филиали №43 БДА ҶТ “Амонатбонк” дар шаҳри Бохтар ба “Фараж” гуфтааст:

“Аз сабаби набудани пули нақд аз рӯзи 5-уми декабри соли ҷорӣ 9 банкомати ин бонк маблағ надошт”.

Дар идома иброз доштааст, ки “бегоҳи 7 декабр барои мо як миллион сомонӣ маблағ доданд, ки ин пулро танҳо дар се бонкомати назди филиал гузаронидем.

Ҳоло 6 банкомати дигари филиали №43 БДА ҶТ “Амонатбонк” дар шаҳри Бохтар пул надоранд. Ҳарчанд мо дархост кардем, аммо бо кадом сабаб маблағро саривақт пардохт намекунанд”.

Гулмаҳмад Тағоев муовини сардори филиали минтақавии БДА “Амонатбонк” №42 дар шаҳри Бохтар гуфтааст, ки дар маркази маъмурии вилояти Хатлон ҳамагӣ 13 банкомат фаъолият доранд, ки аз инҳо 2 ададаш таъмирталаб мебошанд.

Муовини сардори филиали “Амонатбонк” тасдиқ намуда, ки дар маркази вилоят 50 дарсади банкоматҳо маблағ надоранд ва ваъда дода, ки дар кӯтоҳтарин вақт онҳоро бо пул таъмин хоҳанд кард.

Дар шаҳри Хуҷанд ба маркзҳои дилхушии “дискоклубҳо” дигарбора иҷозаи фаъолият додаанд.

Раҳбари Маркази назорати давлатии санитарию эпидемиологии Хуҷанд Таҳмина Усмонова ба “Азия-Плюс” гуфтааст, дар сурати риоя нашудани талабот, онҳо дигарбора дари “дискокулубҳо”-ро мебанданд.

Усмонова гуфтааст,  “шартан ба фаъолияти марказҳои дилхушӣ иҷозати кор дода шуд. Онҳо бояд тамоми қоидаҳои аз рӯйи дастурамал пешбинишударо аз ҷумла пӯшидани ниқоб, пеш аз ворид шудан ба дискоклуб ҳатман санҷиши ҳарорати бадан гузаронанд. Безараргардонии дастон ва гузоштани курсиҳо дар масофаи на кам аз 2 метр аз ҳамдигар дар дохили дискокулубҳоро ба инобат гиранд. Масъулини дискокулубҳо ҳатман бояд ин меъёрро риоя кунанд”.

Иҷозаи марказҳои дилхӯшӣ дар ҳолест, ки як моҳ қабл мақомот ба гуфтаи худашон ин маконҳоро баста буданд, вале як таҳқиқоти Радиои Озодӣ ошкор карда буд, ки дар баробари манъ кардани мақомот марказҳои дулхӯши фаъолият доранд.

Дуввумбора кушодашавии марказҳои дилхушӣ дар шаҳри Хуҷанд дар ҳолест, ки то ба ҳол чанд маротиба масъулони масҷиду ибодатгоҳҳо ба мақомот муроҷиат кардаанд, ки ба намозхонии дастаҷамъии мардум иҷозат дода шавад, вале то имрӯз дари масҷидҳо баста боқӣ мемонад.

Ин дар ҳолест, ки ба гуфтаи коршиносон марказҳои дилхушӣ яке аз омилҳои ривоҷи коронавирус дониста мешаванд, ки бештари кишварҳои ҷаҳон фаъолитяи ин марказҳоро муваққтан боз доштаанд.

Ба гуфтаи Таҳмина Усмонова, ҳоло вазъи эпидемиологӣ дар Хуҷанд “нисбатан идорашаванда” будааст  ва сироятёбӣ ба бемориҳои илтиҳоби шуш ва коронавирус бамаротиб кам гардидааст.