Бино ба хабари Радиои Озодӣ субҳи имрӯз 25 январ “Султони Кабир” – яке аз бозорҳои калони шаҳри Душанбе оташ гирифт. Ин оташсӯзӣ дар қисмати дохилӣ ва ҷойи фурӯши чархҳои мошин сар задааст. Сӯхтор тахминан соати 7:30 сар зада, баъди ду соат хомӯш карда шуд.

Бино ба гуфтаи масъулини Вазорати корҳои дохилии Тоҷикистон сӯхтор “дар натиҷаи расиши кӯтоҳи ноқилҳо сар зада, ду айвони фурӯши молҳои пластикиро фаро гирифт”.

Мақомот гуфтанд, барои хомӯш кардани оташ 16 автомашинаи оташнишонӣ фиристода шудааст.

Бино ба гузориши баъзе манобеъ, барои нигоҳ доштани тартибот дар ҷойи ҳодиса наздики 200 корманди ВКД ҳузур доштаанд. Ин дар ҳолест, ки соҳибкорон ба хабарнигорони Радиои Озодӣ гуфтаанд, ки аз кори оташнишонҳо норозиянд, чун онҳо саривақт оташро хомӯш накарданд.

Вазорати корҳои дохилӣ хисороти дар пайи сӯхтор ба амал омадаро тахминан 800 ҳазор сомонӣ шумурдааст. Ба иттилои ВКД, дар робита ба ин ҳодиса парвандаи ҷиноятӣ оғоз шуда, сабабҳои дақиқи ҳодиса муайян мешавад.

Дар 3 соли ахир ин бори дувум аст, ки дар ин бозори калони Душанбе оташсӯзӣ сар мезанад. Дар сухтори қаблие, ки моҳи июни соли 2018 сар зада буд, дар ин бозор бистуяк мағозаву дӯкон ба коми оташ рафта буд.

“Султони Кабир” яке аз бозорҳои аслии фурӯши маҳсулоти сохтмон ва қисмҳои эҳтиётӣ мебошад. Ин бозор соли 2000 сохта шуда, дар он 1700 соҳибкор кор мекунанд.

Вазири мудофиаи Тоҷикистон дар Парлумон лоиҳаи нави қонуни ҳарбиро муаррифӣ намуда, тибқи он муҳалти хизмат дар артиш мисли солҳои қаблӣ боқи монда нафарони аз хизмат озодшуда муайян шуданд.

Тибқи қонуни нав омӯзгорон, табибон, номзадҳои илм, нафароне, ки дар оила фарзанди ягона ва ё писархонданд, нафароне, ки сарпарастони оила, нафароне, ки тибқи қарори суд аз озоди маҳрум шудаанд, шаҳрвандоне, ки вазъи саломатиашон хуб нест, ҳамчунин ба нафароне, ки нисбаташон парвандаи ҷиноятӣ оғоз гардидааст то бартараф гардидани парванда аз хизмат озоданд.

Вазири мудофиа дар мавриди кам нагардидани муҳлати ҳарбӣ иброз доштааст, ки дар шароити ҳозира то 18 ё 12 моҳ кам кардани муҳлати хизмати ҳарбии ҳатмии муҳлатнок аз лиҳози нигоҳ доштани сатҳи баланди омодабошии ҷангӣ ва омилҳои иқтисодӣ ба мақсад мувофиқ намебошад.

Ба гуфтаи ӯ, “дар кишварҳое, ки муҳлати хизмати ҳарбиашон 12 ё 18 моҳ мебошад, хизмати ҳарбии шартномавӣ ҷорӣ гардида, сатҳи омодабошии ҷангӣ аз ҳисоби ҳамин ҷузъу томҳо, ки зиёда аз 50 фоизи шумораи умумиро ташкил медиҳанд, нигоҳ дошта мешавад”.

Вазир дар идома иброз доштааст, ки то 18 моҳ кам кардани муҳлати хизмати ҳарбӣ, бо дарназардошти хусусиятҳои таъминоти ақибгоҳӣ (муҳлатҳои истифодабарии сарулибос ва дигар амволи шайъӣ), хароҷотро то 30 фоиз зиёд менамояд.

Дар лоиҳа ба таври муфассал дар мавриди шаҳрвандоне, ки аз хизмати ҳарбӣ озод шудаанд, зикр гардидааст:

– шаҳрвандоне, ки бинобар вазъи саломатӣ ғайриқобили хизмати ҳарбӣ дониста шудаанд, дар дигар давлат хизмати ҳарбиро ё ба он баробаркардашударо, инчунин хизмати ҳарбиро дар ҳайати захираҳои даъвати сафарбарӣ адо кардаанд, бо ҳукми суд аз озодӣ маҳрум карда шудаанд, ба хизмати ҳарбӣ даъват карда намешаванд.

– шаҳрвандоне, ки падар (модар), бародар (хоҳарашон) ҳангоми адои хизмати ҳарбӣ вафот кардаанд ё маъюби гурӯҳҳои 1 ва 2 гардидаанд, онҳое, ки дар оила писари ё писархонди ягона ҳастанд;

– шахсони дорои унвони номзади илм, доктори фалсафа, доктор аз рӯи ихтисос, доктори илмро соҳиб гардидаанд, аз хизмати ҳарбӣ озод шаванд.

– шаҳрвандоне, ки муваққатан ғайриқобили хизмати ҳарбӣ дониста шудаанд, ба нигоҳубини узви оилаи ба кумак эҳтиёҷдошта машғул мебошанд, дар ҳолати набудани шахсони дигар, ки тибқи қонун уҳдадоранд ба нигоҳубин машғул шаванд, ба таъхир андохта мешавад.

– нафароне, ки дар муассисаҳои таълимии таҳсилоти миёнаи умумӣ, ибтидоӣ ва миёнаи касбӣ таҳсил менамоянд, ба тарбияи кӯдаки аз модар маҳруммондаашон машғул мебошанд ва шахсоне, ки нисбат ба онҳо парвандаи ҷиноятӣ оғоз карда шудааст, то бартараф гардидани шартҳои зикргардида низ аз хизмат озод мебошанд.

– даъватшавандае, ки модараш ба ғайр аз ӯ боз ду фарзанди ноболиғро танҳо тарбия менамояд, вакилони маҷлиси маҳаллии вакилони халқ, донишҷӯёне, ки бори аввал дар шуъбаҳои рӯзонаи муассисаҳои таълимии таҳсилоти олии касбӣ аз рӯи дараҷаи бакалавр ё мутахассис таҳсил менамоянд, метавонанд хизмати ҳарбиро ба таъхир андозанд.

-омӯзгороне, ки дорои маълумоти олии омӯзгорӣ буда, дар муассисаҳои таҳсилоти умумии деҳот ва онҳое, ки таҳсилоти олии тиббӣ дошта, дар муассисаҳои таҳсилӣ ё тиббии деҳот кор мекунанд, шаҳрвандоне, ки ду ва зиёда фарзанд доранд, барои ба таъхир гузоштани муҳлати даъват ба хизмати ҳарбӣ ҳуқуқ доранд.

Дар ноҳияи Қубодиёни вилояти Хатлон як корманди ҳукуматро ба хотири ҷавоб надодан ба муроҷиати шаҳрвандон ҷарима карданд. Дар ин бора Прокуратураи генералии Тоҷикистон иттилоъ дод.

Прокуратураи генералии кишвар менависад, ки ба хотири дағалона вайрон кардани талаботи Қонуни Ҷумҳурии Тоҷикистон “Дар бораи муроҷиатҳои шахсони воқеӣ ва ҳуқуқӣ” аз ҷониби Сатторов Абдураҳим, мудири заминсозии ҷамоати деҳоти Носири Хисрави ноҳияи Қубодиён ба миқдори 100 нишондиҳанда ҷарима карда шуд.

“Сатторов Абдураҳим аз 04 майи соли 2015 дар вазифаи заминсози ҷамоати деҳоти Носири Хисрави ноҳияи Қубодиён кору фаъолият намуда, дар давраи фаъолияти кориаш талаботҳои Қонуни Ҷумҳурии Тоҷикмстон «Дар бораи муроҷиатҳои шахсони воқеӣ ва ҳуқуқӣ»-ро дағалона вайрон намуда, муроҷиатҳои шаҳрвандон Худойназарова О., Хушвахтов М., Беков А., Норов Б., Бобомуротов С., Дустмуродова И., Бобомуродов С. ва муроҷиати сардори Раёсати кишоварзии ноҳияи Қубодиёнро мавриди баррасӣ қарор надода, ба ҳуқуқ ва манфиатҳои ҳифзшудаи онҳо зарари ҷиддӣ расонидааст”, – омадааст дар хабари ин ниҳод.

Гуфта мешавад, нисбати Сатторов А. Прокуратураи вилояти Хатлон 18 сентябри соли 2020 бо моддаи 163-қисми 1-и (баррасӣ накардани муроҷиатҳои шаҳрвандон) КҶ Ҷумҳурии Тоҷикистон парвандаи ҷиноятӣ оғоз намуда он баъди анҷоми тафтиши пешакӣ ба суд ирсол карда шуд.

Ба гуфтаи Прокуратураи генералӣ, суди ноҳияи Қубодиён Сатторовро тибқи моддаи 163-қисми 1-и КҶ Ҷумҳури Тоҷикистон гунаҳгор дониста ва ба андозаи 100 нишондиҳанда барои ҳисобҳо баробар ба 5800 сомонӣ ҷарима карда шуд.