Имрӯз, 23-уми декабри соли 2022 дар “Кохи Сомон” Президент Эмомалӣ Раҳмон дар ҷаласаи якҷояи Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон Паёми солонаашро ироа кард.

Паёми имсолаи Раҳмонов “Дар бораи самтҳои асосии сиёсати дохилию хориҷии Ҷумҳурии Тоҷикистон” унвон дошт, ки дар ҳузури намояндагони парлумони кишвар гуфта шуд.

Бино ба иттилои Хадамоти Президент, дар Паёми солонаи раисҷумҳур “аъзои Маҷлиси миллӣ ва вакилони Маҷлиси намояндагон, Сарвазир ва аъзои Ҳукумат, Роҳбари Дастгоҳи иҷроияи Президент, роҳбарияти вазорату кумитаҳои давлатӣ, идораҳои назди Президент ва Ҳукумат, мақомоти марказии судӣ ва дигар ниҳодҳои ҳифзи ҳуқуқу тартибот, Академияи миллии илмҳо, муассисаҳои олии таълимӣ, роҳбарони марказҳои татбиқи лоиҳаҳои сармоягузорӣ, як гуруҳ собиқ вакилони Иҷлосияи XVI Шӯрои Олии Ҷумҳурии Тоҷикистон, аъзои Шӯрои ҷамъиятӣ, Ҳаракати Ваҳдати миллӣ ва эҳёи Тоҷикистон, вакилони як қатор иттиҳодияҳои ҷамъиятӣ, сиёсӣ ва эҷодӣ, роҳбарияти корхонаю муассисаҳои ҷумҳуриявӣ, бонкҳо, доираи тоҷирону соҳибкорон ва ҷавонон, намояндагони ҳайати дипломатӣ ва воситаҳои ахбори умум” иштирок  кардаанд.

Тавре коршиносон аз ин Паём натиҷагирӣ мекунанд, тақрибан сухани нав ва барномаи амалишавандаи ҷадиде ироа нагардид. Эмомалӣ Раҳмон дар Паёмаш низ мисли ҳарвақта оморҳои соли ҷориро бо оморҳои соли 1991 муқоиса намуда, аз “пешрафт” ба мардум гӯшзад кард. Ӯ ин бор ба таври умум дар барои сиёсати хориҷӣ, роҳҳои пешрафти соҳаҳои иқтисоду саноат, энергетика, роҳу нақлиёт, амнияту мудофиа, ҳифзи ҳуқуқу тартибот, тандурустӣ, фарҳанг, илму маориф, ҳифзи иҷтимоии аҳолӣ, ҷавонон, варзиш ва сайёҳӣ суҳбат кард.

Инчунин раисҷумҳури кишвар аз боло бурдани маошу нафақа дар Тоҷикистон дар соли 2023 гуфт ва ба қавле мардумро умедвор кард.

Ӯ гуфт: “Аз 1 марти соли 2023 музди меҳнати кормандони ҳифзи ҳуқуқ, хизматчиёни ҳарбӣ 25 дарсад ва дигар кормандони ин мақомот 20 фоиз зиёд мешавад;

аз 1 июли 2023 музди меҳнати кормандони маориф, тандурустӣ, соҳаи ҳифзи иҷтимоӣ, стипендияҳо 20 дарсад афзоиш меёбад;

аз 1 июли 2023 андозаи нафақаи заминавӣ 20 дарсад зиёд мешавад;

ҳамчунин нафақаҳои суғуртавӣ ва давлатӣ дар сатҳи таварруми 2 соли ахир, вале на кам аз 16 дарсад зиёд мешавад ва дигар намуд нафақаҳо 20 дарсад афзоиш меёбад.”

Тавре маълум аст, Раҳмонов дар ҳар паёмаш аз боло бурдани маошу нафақаҳо мегӯяд, аммо худи кормандони соҳаҳои буҷетӣ, хусусан омӯзгорон ва нафақагирон ҳамеша аз камии музди меҳнат шикоят мекунанд. Ба гуфтаи аксари онҳо, он дарсаде, ки тибқи ваъдаи Раҳмонов дар сари маошҳояшон афзуда мешавад, ё ба онҳо пурра дода намешавад ва ё ин ки то он вақт нарху наво дар бозорҳо ба маротиб боло меравад, ки маош боз ҳам нокофӣ боқӣ мемонад. Ин дар ҳолест, ки тибқи оморҳои расмӣ шаҳрвандони Тоҷикистон дар миёни кишварҳои Шӯравии собиқ аз ҳама кам маошу нафақа мегиранд.

Ҳамзамон раисҷумҳур аз тавлиди нерӯи барқи аз ҷиҳати экологӣ тоза ва таҷдиди неругоҳҳо, аз ҷумла НБО-и “Норак” тавсиф кард, аммо аз мушкилоти асосии мардум, ки камбуди барқ ва ҷорӣ шудани лимит дар фасли сармо аст, чизе нагуфт.

Раҳмон дар Паёмаш аз сокинон хост дар истифодаи барқ сарфакор бошанд ва аз масъулин талаб кард то раванди ба низоми биллингӣ гузаштан, ки дар ин низом сокинон маблағи барқро пешакӣ пардохт мекунанд ва баъди тамом шудани маблағ, интиқоли барқ қатъ мешавад, суръат бахшида шавад.

Ба гуфтаи раисҷумҳур, ҷорӣ кардани ин низом дар бархе ноҳияҳо нишон дод, ки талафоти барқ 80-90 дарсад кам шуда, ҷамъоварии маблағ қариб ба 100 дарсад расидааст.

Бетаваҷуҳуии Раҳмонов ба набуди барқ ва таърифу тавсифаш аз тавлиди нерӯи барқи аз ҷиҳати экологӣ тоза ва таҷдиди нерӯгоҳҳо дар ҳолест, ки сокинони кишвар аз фасли тирамоҳ ба ин тараф аз камбуди барқ шикоят доранд. Ба фарқ аз паёми имсолааш, Раҳмонов дар гузашта аз афсона шудани лимити барқ мегуфт, аммо имсол аз ин суханҳо чизе набуд.

Раисҷумҳури Тоҷикистон Эмомалӣ Раҳмон дар паёми солонааш ба Маҷлиси Олӣ боз аз гурӯҳҳои террористиву экстремистӣ ва роҳҳои пешгирӣ аз пайвастани шаҳрвандон ба ин гурӯҳҳо гуфт.

Имрӯз, 23-юми декабри соли 2022 дар “Кохи Сомон” ҷаласаи якҷояи Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон баргузор гардида, Эмомалӣ Раҳмон паёмашро ба Маҷлиси Олӣ ироа кард.  

Дар ин ҷаласа раисҷумҳур гуфт, ки гурӯҳҳои террористиву эктремистӣ, барои даъват ва ҷалб намудани шаҳрвандон ба сафҳои худ аз технологияҳои муосири иттилоотӣ роҳу усулҳои навро истифода мекунанд ва ҷавонони камтаҷрибаву ноогоҳро бо ғояҳои тундгароӣ гумроҳ месозанд. Аммо Раҳмонов аз ягон гурӯҳу ташкилоте мушаххас ном набурд.

Раҳмонов аз мақомоти дахлдор хост, ки “ҳамоҳангсозии фаъолиятро дар самти ошкор ва пешгирӣ намудани хавфу хатарҳои террористиву экстремистӣ боз ҳам вусъат бахшида, бо роҳи тақвияти корҳои фаҳмондадиҳӣ пеши роҳи гароидани ҷавононро ба равияҳои ифротгаро гирифта, онҳоро дар рӯҳияи садоқат ба халқу Ватан ва эҳтиром ба арзишҳои умумиинсонӣ тарбия намоянд”.

Инчунин Президент барои пешгирӣ намудани ҷиноятҳои хусусияти экстремистиву террористидошта ва ҷиноятҳое, ки бо истифодаи технологияҳои иттилоотиву коммуникатсионӣ содир карда мешаванд, ба Прокуратураи генералӣ, КДАМ ва ВКД супориш дод то барои таъсиси Маркази ягонаи иттилоотӣ якҷо бо дигар вазорату идораҳо ин масъаларо омӯхта, ба Ҳукумат пешниҳод кунанд.

То ҳол маълум нест “Маркази ягонаи иттилоотӣ”, ки Раҳмонов барои таъсиси он супориш дод чӣ кореро анҷом хоҳад дод. Аммо мақомоти кишвар солҳои охир бо баҳонаҳои экстремизму терроризм нафаронеро, ки зери навори мухолифон лайк гузоштаанд равонаи зиндон кардаанд. Ҳатто рӯзноманигорону фаъолонро барои ибрози андеша дар шабакаҳои иҷтимоӣ боздошту ба солҳои тӯлонӣ зиндонӣ кардаанд.

Дар ҳамин ҳол раисҷумҳур ғайричашмдошт аз сифати Интернет дар Тоҷикистон нитиқод карда гуфт, “нарху суръати Интернет қонеъкунанда нест.”

Эмомалӣ Раҳмон мегӯяд, “таъмин намудани суръати баланди Интернет ва дастрас будани нархи он барои рушди иқтисоди рақамӣ, зеҳни сунъӣ таъмин намудани амнияти иқтисодӣ ва ҷалби сармоя зарурӣ мебошад”.

Тибқи омори президент, теъдоди муштариёни интернет дар Тоҷикистон ба 4,3 миллион нафар расидааст, аммо ба гуфтаи Раҳмон “суръат ва арзиши интернет ҳанӯз қонеъкунанда нест. Сайёҳон ба куҷо мераванд, ба он кишвар, ки суръати баланди интернет дорад”.

Эмомалӣ Раҳмон аз Хадамоти алоқа ва ширкатҳои мухобиротӣ талаб кард, барои боло бурдани суръати Интернет, паст кардани нархи он ва дастрас кардани интернети баландсуръат дар минтақаҳо чораҳои зарурӣ андешанд.

Танқиди Эмомалӣ Раҳмон аз суръати Интернет дар кишвар дар ҳолест, ки солҳост сокинон ва меҳмонон аз бад будани сифати он ва нархи гарони он шикоят мекунанд. Аммо Ҳукумат, аз ҷумла Хадамоти алоқа бо сарварии Бек Сабур, қудои раисҷумури Тоҷикистон ҳамеша аз сифати Интернет дар кишвар тавсиф намуда, дар аксар ҳолатҳо ё аз суол дар ин бора мегурезед, ё телефонҳои мобилии сокинонро сабаби суст будани Интернет мехонад.

Дар умум Раҳмонов дар ин паёмаш низ суханҳои тозае барои мардум пешкаш накард, ба ҷуз ҳарфҳои такрории обшуста, ки солҳост садо медиҳанд.

Яке аз нуктаҳои такрории ин паёмҳо, ки бештар аз ҷониби коршиносон мавриди интиқод қарор мегирад, ин муқоисаи шароити иқтисодӣ ва оморҳои солҳои 90-уми ба ин солҳост. Ба гуфтаи огоҳони умур, чунин муқоисакунӣ, ки гӯё 25-30 соли пеш буҷаи кишвар фалон миқдор буду ҳоло фалон миқдор шудааст ва инро ба рушди иқтисоди кишвар ва беҳтар шудани шароити иқтисодии мардум намоиш додан, оқилона нест. Бино ба гуфтаи онҳо, бояд Раҳмонов дар чунин муқоисакуниҳо бояд беқурбшавии пули миллиро низ дар баробари асъори хориҷӣ ба инобат бигирад, дар он ҳолат маълум хоҳад шуд, ки давоми ин солҳо иқтисоди кишвар чӣ миқдор рушд кардааст.