Ҷумҳурии Исломии Эрон ва Шоҳигарии Арабистони Саудӣ дар Чин таъкид кардаанд, ки ба хотири таъмини амният, суботи минтақа ва шукуфоии ҳар ду кишвар тавофуқоти худро дубора фаъол месозанд.

Бино ба иттилои расмӣ, субҳи имрӯз бо мизбонии Вазорати корҳои Ҷумҳурии Халқии Чин Ҳусайн Амир Абдуллоҳиён ва Файсал бин Фарҳон, вазирони корҳои хориҷии Ҷумҳурии Исломии Эрон ва Шоҳигарии Арбистони Саудӣ дар Пекин мулоқо карданд.  

Ба қавли манбаъ, Вазирони корҳои хориҷии Эрон ва Арабистон дар Пекин тавофуқ карданд ҳамкориҳои худро дар ҳар заминае, ки метавонад амният ва суботи минтақаро таъмин кунад ва манофеи миллатҳо ва кишварҳои онро муҳаққақ созад, густариш диҳанд.

Дар рафти ин муллоқот ҷонибҳо дар бораи бозгӯшоии сафоратхонаҳо ва консулгариҳо дар шаҳрҳои Теҳрон ва Риёз, тасҳини рафту омадҳои расмӣ, гирифтани раводиди шаҳрвандон ва аз саргирии парвозҳои мустақим байни ду кишвар ба тавофуқ расиданд.

Гуфта мешавад, Арабистону Эрон ду кишвари ҳамсоя дар ғарби Осиё мебошанд, ки онҳоро баҳр аз ҳам ҷудо мекунад. Мулоқоти вазирони корҳои хориҷии ин ду кишвар бо мизбонӣ ва миёнҷигарии Чин баъд аз қатъи равобити 7-сола ва душмантарошиҳо аз якдигар дар Пекин сурат гирифтааст.

Тибқи қарордоде кишвари Лаҳистон кумакҳои низомии навбатии худро ба Украина мефиристад.

Дирӯз, 5-уми апрел дар ҷараёни сафари кории раисҷумҳури Украина Владимир Зеленский ба Лаҳистон, ҷонибҳо созишнома дар бораи бастаи кумакҳои нави низомиро ба имзо расонидаанд.

Бино ба иттилои Владимир Зеленский, тибқи ин созишнома Лаҳистон ба Украина зиреҳпӯшҳои “Rosomak”, системаи сайёри зенити-ракетии “Piorun” ва миномётҳои худгарди “Rak” медиҳад.

Зеленский имзои ин созишномаро муҳим номида гуфт, ки ин аслиҳа барои наҷоти ҷони украинҳо заруранд ва озодиву истиқлолияти на танҳо Украина, Лаҳистон ва Аврупо, балки тамоми ҷаҳонро ҳифз мекунад.

Инчунин гуфта мешавад, ҷониби Лаҳистону Украина дар ин дидори худ масъалаи таъсиси корхонаҳои муштараки тавлиди силоҳу муҳимоти ҷангиро баррасӣ кардаанд.

Зеленский мегӯяд, ки “Лаҳистон дар эътилофи танкҳо пешсафӣ нишон медиҳад, қадами навбатӣ эътилофи ҳавопаймоҳои ҷангӣ аст”. Гуфта мешавад, лаҳистониҳо дар ин муддати ҷанг ба Украина 300 танк додаанд.

Дар ҳамин ҳол раисҷумҳури Лаҳистон Анжей Дуда эълом кард, ки Лаҳистон 8 ҳавопаймои ҷангии МиГ-29-ро ба Украина супурд ва рӯзҳои наздик 6 ҳавопаймои дигарро низ хоҳад дод. Дар назар аст Лаҳистон 28 ҳавопаймои ҷангии МиГ-29-ро ба Украина бидиҳад.

Владимири Зеленский ҳамчунин аз имзои санади алоҳида бо Лаҳистон дар бораи ҳамкорӣ дар барқарорсозии Украина хабар дод ва гуфт, ки ин санад ба рушди ҳарду кишвар мусоидат мекунад.

Ёдовар мешавем, ки Владимир Зеленский, раисҷумҳури Украина ҳамроҳ бо хонумаш Елена Зеленска дирӯз 5-уми апрел бо як сафари расмӣ ба Лаҳистон рафт ва бо Анжей Дуда, раисҷумҳури Лаҳистон ва ҳамсараш, бо нахуствазири ин кишвар Матеуш Моравитский, инчунин бо полякҳо ва украиниҳои муқими Лаҳистон мулоқот кард.

Баъд аз ҳамлаи беасоси Русия ба Украина, Лаҳистон яке аз кишварҳоест, ки ҳукумат ва мардуми Украинаро бо ҳама навъи кумакҳо дастгирӣ кардааст.