Як гурӯҳ аз сокинони ноҳияи Сангвор (собиқ Тавилдара) аз он шикоят доранд, ки масъулон ба ҷои он ки мушкилоташонро ҳал кунанд, баракс, зиндагиашонро душвортар кардаанд.

Як сокини ин ноҳия, ки нахост номаш зикр шавад, дар сӯҳбат ба “Аздо тв” гуфт, зиндагӣ дар ин ноҳияи кӯҳии кишвар рӯз то рӯз душвортар мегардад.

Ба қавли ӯ, асосан зиндагии сокинони ноҳия аз ҳисоби чорводорӣ ва ҷамъи тиллову корҳои дигар мегузашт, аммо як ширкати чинӣ дар ноҳия ба ҷамъи тилло машғул шудааст ва дигар сокинонро намегузорад ба ин кор даст бизананд.

Агар ҳар кӣ тилло ҷамъ кунад ҳангоми фурӯхтан ӯро андози зиёд мебанданд, ки хеле кори ҷамъи тиллоро душвор мекунад. Ин мушкилот сабаб шуда, ки аксари сокинон ба Русия барои кор раванд, “ҳоло аз ҳар хонае то 2-3 нафар дар муҳоҷиратанд”, мегӯяд ҳамсӯҳбати мо.

Ҳамзамон ҳамсӯҳбати мо гуфт, Шукурҷон Зуҳуров, собиқ раиси Маҷлиси намояндагони Маҷлиси Олии Тоҷикистон дар ноҳия меҳмонхонае сохтааст, ки макони кайфу сафои кормандони КДАМ ва пулис гаштааст ва ҳар коре дилашон бихоҳад мекунанд.

Дар идомаи сӯҳбаташ гуфт: “Кормандони КДАМ ва пулису дигар мақомот аз номи Президент ва Ҳукумат қонуншиканиҳои зиёд мекунанд, ба мардум ҷабр мекунанд, аммо касе нест пеши роҳи онҳоро бигирад, аз ҳукумати кишвар талаб мекунем, ки пеши роҳи мардуми қонуншикан дар либоси коргари Ҳукуматро бигирад, инҳо обрӯ ва эътимоди Президент ва Ҳукумати мамлакатро дар назди мардум коста кардаанд”.

Ин манбаи “Аздо тв” аз гаронии нарху наво дар ноҳия шикоят намуда, гуфт, як халта орде, ки дар пойтахт 250-270 сомонӣ бошад дар ин ноҳия 315-330 сомонӣ аст ва равғане, ки дар Душанбе 80-90 сомонӣ бошад дар ноҳияи Сангвор (Тавилдара) 120 ва болотар аз он фурӯхта мешавад.

Сабаби гаронии нарху наворо дар ин ноҳия ба роҳҳои нотамому мушкилгузар рабт дода мегӯяд, ки роҳи ободе надоранд, ки тоҷирон бехавф ба Душанбе ва дигар навоҳӣ бираванд.

Манбаъ дар охир мегӯяд, соли 2018 вақте, ки Эмомалӣ Раҳмон ба ин ноҳия сафар дошт, намояндагони ҳукумат пул ё ҳамон купруки қишлоқи Ёзғандро канда ба деҳаи Гурумбак бурда гузоштанд, ки Раҳмон аз онҷо бояд мегузашт. Ва ҳоло он қишлоқ роҳи ободе надорад ва ҳамон як купруке, ки дошт он ҳам канда шуд.

Ин назари чанде аз сокинони ноҳияи мазкур буд, ки ба дасти “Аздо тв” расид, аммо дар мавриди ҷой доштани чунин мушкилот то ҳол назари худи мақомоти ноҳия дастрас нест. Дар сурати дастрас гаридани вокунеше аз ҷониби масъулони ноҳия “Аздо тв” онро нашр хоҳад кард.

Вазорати корҳои дохилаи Тоҷикистон рӯзи 1-уми феврал дар як хабар аз боздошт шудани ҷавони 21 сола хабар дод. Ин ҷавон Айниддин Давлятов ном дошта, бо иттиҳоми қасди одамкушӣ муттаҳам мешавад.

Тибқи иттилои баёнияи расмии Раёсати ВКД-и Душанбе Айниддин Давлятови 21-сола ба сабаби хусумати шахсӣ ба Музаффар Имомоназаров декани бахши менеҷменти байналмилалии Донишгоҳи технологии Тоҷикистон ба шиками ӯ корд зада, сахт захмӣ кардааст.

Дар баёнияи расмии раёсати ВКД-и шаҳри Душанбе сабаби сар задани ин ҳолатро чунин шарҳ додаанд:

“Давлятов Айниддин аз он ки падараш аз нахондану қарздории ӯ аз имтиҳонҳо тавассути декани факултет огоҳ шуда, ӯро сарзаниш кардааст нақшаи аз ҳаёт маҳрум сохтани деканро тарҳрезӣ намудааст. Бо ин мақсад, санаи 28-уми январи соли ҷорӣ бо корд мусаллаҳ гашта, декани факултети худро дар назди утоқи кориаш бо корд захмӣ карда, аз ҷойи ҳодиса фирор мекунад.”

Дар ин маврид назари волидайн ва ё вакили дифои муттаҳам ба ҷиноят маълум нест. Додситонӣ ба зидди Айниддин Давлятов бо иттиҳоми суиқасд ва ё талош барои одамкушӣ парванда боз кардааст ва дар сурати собит шудани иттиҳом мумкин аст ӯро аз 8 то ба 15 соли зиндон маҳкум кунанд.

Бино ба иттилои Радиои Озодӣ айни замон омӯзгор дар бемористон муолиҷа мегирад.

Як устоди ин донишгоҳ дар суҳбат бо Радиои Озодӣ гуфт, ки Музаффар Имомназаров дар корпуси 5-уми беморхонаи Қарияи Боло бистарӣ аст ва ӯро чанд маротиба ҷарроҳӣ намуданд ва айни замон вазъи саломатиаш муътадил гуфта мешавад.

Музаффар Имомназаров, дотсент, номзади улуми иқтисодӣ буда, аз 1-уми феврали соли 2019 декани факултаи менеҷменти байнулмилалӣ ва маркетинг мебошад.

Юсуф Раҳмон, Додситони кулли Тоҷикистон латукӯб шудани Маҳмурод Одинаев, муовини раиси ҲСДТ-ро дар боздоштгоҳ рад кард. Инро ӯ дар нишасти хабарии рӯзи 2-юми феврал гуфт.

Ба гуфтаи Юсуф Раҳмон латукӯб шудани Одинаев “асос надорад”. “Гапи латукӯб шудани ӯ дурӯғ аст, иғво аст”, – афзуд додситони кул.

Дар ҳоле, ки худи Одинаев дар охирин мурофиаи додгоҳӣ, ба рӯзноманигорон гуфта буд, ӯро задаанд ва сутунмуҳрааш осеб дидааст. Наздиконаш низ гуфтанд, ки ӯ шиканҷа шуда, “базӯр ба пой рост меистод”.

Ин дар ҳолест, ки яке аз наздикони Маҳмурод Одинаев пештар дар сӯҳбат бо “Аздо тв” шиканҷа шудани Одинаевро тасдиқ карда буд. “Ба дараҷае, ки одамро намешиносад дигар, ҳатто хотираашро гум кардааст”. Ӯ гуфт, ки қабл аз мурофиа Одинаевро бардошта овардаанд, худаш хуб роҳ гашта наметавонистааст. Инчунин гуфт, ки сутунмуҳраи Одинаев аз сабаби шиканҷаи зиёд осеб дидааст. Одинаев ба наздиконаш гуфтааст, агар маро аз инҷо набароред мурдаамро мебароред.

Юсуф Раҳмон ҳамзамон дар робита ба парвандаи ин фаъоли сиёсӣ гуфт, дар бораи ӯ далелҳои кофӣ ҷамъ шуда буд.

Дар идомаи ин нишасти хабарӣ, Юсуф Раҳмон боз дар бораи ба ҳабс гирифтани 10 нафари дигар, ки бо иттиҳоми ҳамкорӣ бо гурӯҳҳои иттилоотии дар ҳориҷ қарордошта хабар дод.

Ба гуфтаи додситон, онҳо “маълумоти бардурӯғ ва иғвоангезро бар зидди Ҳукумати ҷумҳурӣ” ба хориҷ ирсол мекардаанд. Аммо аз ҳеҷ кадоми ин боздоштшудаҳо ном набурд.

Бино ба навиштаи сомонаи ҳукуматии “Ховар” Додситони кул дар идома қайд кардааст, ки “Дар оянда низ ҳар нафаре, ки ба манфиати хоинони миллат фаъолият мекунад, ошкор шуда, ҳатман ба ҷавобгарии ҷиноятӣ кашида мешавад”. Вале Юсуф Раҳмон “хоинони миллат” ва “гуруҳҳои иттилоотӣ” гуфта киро дар назар дорад, чизе нагуфтааст.

ИНЧУНИН, БИХОНЕД: Маҳмурод Одинаев ба 14 соли зиндон маҳкум шуд

Прокуратураи генералии Тоҷикистон рӯзи 1 феврал хабар дод, ки як сокини ноҳияи Хуросон бо номи Исломов Ҷалолиддин Алимуллоевич 21 сентябари соли 2020 барои ҳалок намудани аҳли хонаводааш, ки майнӯшии ӯро монеъ мешудаанд, дар деги хӯроки онҳо 5-6 адад доруи навъи “Азалептин” ва як миқдор пайвастагиҳои органикии фосфордор ва хлордорро андохтааст, ки дар натиҷа баъди истеъмоли хӯрок аҳли хонавода ҳама заҳролуд шудаанд.

Бар асари заҳролудшавии шадид модараш Исломова Назокат Мирзомуродовна вафот карда, шаш нафари дигар аз аъзоёни ин оила бо нишонаҳои заҳролудшавии шадид дар шуъбаи эҳиёгарии беморхонаи марказии н.Хуросон бистарӣ гардидаанд.

Прокуратураи н.Хуросон нисбати Исломов Ҷ.А., бо моддаҳои 104 қисми 1 ва 32 қисми 3-104 қисми 2 бандҳои “а,в,ж”-и КҶ Ҷумҳурии Тоҷикистон парвандаи ҷиноятӣ оғоз намуда, онро баъди ба итмом расонидан ба суд ирсол намудааст.

Додгоҳи вилояти Хатлон 29 декабри соли 2020 Исломов Ҷалолиддинро бо моддаҳои 104 қисми 1 ва 32 қисми 3-104 қисми 2 бандҳои “а,в,ж”-и КҶ ҶТ гунаҳгор дониста, барои маҳрум сохтан аз озодӣ ба муҳлати 18 сол бо адо намудани ҷазо дар колонияи ислоҳии дороӣ низомаш сахт ҳукм содир кард.

Падидаи номатлуби куштани аъзои хонавода аз ҷониби як узви дигари он амрест нодир, вале чанд соласт, ки дар Тоҷикистон зиёд ба гӯш мерасад.

Ҷомеашиносон омилҳои чунин ҷиноётро бештар ба ҳолати равонии омилони он рабт медиҳанд. Аммо дар баробари ин метавонад шароити пасти иқтисодӣ ва бекории ҷавонон низ яке аз омилҳои ин гуна ҷиноятҳои мудҳиш бошад.