Вазири умури хориҷаи Тоҷикистон Сироҷиддин Муҳриддин рӯзи 4 май дар Душанбе бо намояндаи вижаи ИМА барои сулҳ дар Афғонистон Залмай Халилзод мулоқот кард.

Сомонаи “Авеста” бо истинод ба манбааш дар вазорати умури хориҷаи Тоҷикистон навишт, ки дар ин дидор масоили ҳамкориҳои дуҷониба, бисёрҷониба ва минтақавӣ, ҳамчунин вазъ дар Афғонистон баррасӣ шуданд.

Аз ҷумла онҳо масоили музокироти сулҳи байни афғонҳо, омодагӣ ба Конфронси Истанбул ва берунрафти нерӯҳои хориҷӣ аз Афғонистонро баррасӣ карданд.

Дар идомаи ин гуфтугӯ Сироҷиддин Муҳриддин таъкид кард, ки Тоҷикистон аз мавқеъи ҳукумати Афғонистон ва хостаҳои ҷомеъаи ҷаҳонӣ дар таъмини сулҳу субот дар ин кишвар пуштибонӣ мекунад.

Зимни баррасии ҳамкориҳои байни кишварҳо дар доираи созмонҳои байналмилалӣ, алалхусус Созмони Миллали Муттаҳид, ҷонибҳо аз сатҳи хамкорӣ дар мубориза бо терроризм ва экстремизм изҳори қаноатмандӣ намуданд.

Мусоҳибон ба ҷонибдории тақвияти ҳамкорӣ дар самти муборизаи муштарак алайҳи таҳдидҳои муосир, аз қабили терроризм, экстремизм, гардиши ғайри қонунии маводи мухаддир ва ҷинояткории фаромиллӣ сухан гуфтанд.

Ба гуфтаи манбаъ дар ин дидор ҳамчунин ба зарурати рушди ҳамкории мутақобилаи Тоҷикистон ва Иёлоти Муттаҳидаи Амрико таъкид шуд.

Тибқи фармони Эмомалӣ Раҳмон, Раҳмонзода Абдуҷаббор Азизӣ рӯзи 4-уми май сафири Тоҷикистон дар Узбекистон таъйин шуд.

Ёдовар мешавем, ки қаблан Сафири Тоҷикистон дар Узбекистон Содиқ Имомӣ буд, ки бо фармони Раҳмон муовини вазири корҳои хориҷии кишвар таъйин шуд.

Абдуҷаббор Раҳмонзода аз соли 2014 то ироаи ин фармон, ба ҳайси Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа кор кардааст.

Раҳмонзодаи 62 сола дар гузашта дар вазифаи Ректори Донишгоҳи омӯзгории Тоҷикистон, Раиси Кумитаи телевизион ва радиои назди Ҳукумати Ҷумҳурии Тоҷикистон, Вазири маорифи Ҷумҳурии Тоҷикистон кор мекард.

Мардум Абдуҷаббор Раҳмонзодаро бо тасмиму изҳоротҳои баҳсбарангезаш мешиносанд.

Аз ҷумла замоне, ки ӯ ректори Донишгоҳи омӯзгории Тоҷикистон буд, талаб намуда буд, ки духтарони донишҷӯ бо пошнаи баланд ба дарс ҳозир шаванд. Инчунин пешниҳод намуда буд, ки аз донишҷӯёни дарсгурез ҷарима ситонида шавад.

Раҳмонзода ҳангоми раиси Кумитаи телевизион ва радио будан саводи кормандони эҷодиро зери суол бурда, ҳамаро аз як диктанти умумии забони тоҷикӣ гузаронд. Вақте вазири маориф буд,  пушидани либоси исломиро дар мактаб ва донишгоҳҳо манъ карда, истифода аз мошини шахсӣ ва телефонҳои мобилҳоро мамнуъ кард.

Абдуҷаббор Раҳмонзодаро бо ин фармонҳояш мардум интиқод намуда, худи ӯро дар тундлаҳнӣ ва ҳам зиёдаравӣ муттаҳам мекарданд.

Сомонаи “Авесто” бо такя ба манбааш дар котиботи матбуотии Вазорати умури хориҷаи Тоҷикистон нигошта, ки Тоҷикистон Туркияро дар мавриди вазъи марзи Тоҷикистон ва Қирғизистон огоҳ кард.

Бино ба иттилои манбаъ имрӯз 4 май муовини аввали вазизири умури хориҷаи Тоҷикистон Хусрав Нозирӣ сафири Туркия дар Тоҷикистон Эмре Закӣ Карагёлро ба ҳузур пазируфт.

Дар мулоқот муовини вазири умури хориҷа ба дипламати турк дар мавриди руйдодҳои охирин ва вазъи кунунии марзи Тоҷикистон бо Қирғизистон нақл кард.

Дар робита ба ин таъкид шуд, ки Душанбе иродаи қавии сиёсӣ барои мушаххас кардани марзи давлатӣ бо Қирғизистон тавассути гуфтушунидҳо ва дар асоси созишномаҳои каблан ҳосил шударо дорад.

Сафири Туркия дар навбати худ бо ишора ба муносиботи дустонаи Тоҷикистону Туркия таъкид намуд, ки ҷониби Туркия аз идомаи музокироти тарафҳо дар марз пуштибонӣ мекунад ва омода аст ба Тоҷикистон ба хусус ба шаҳрвандони зарардида дар ин низоъи марзӣ кумаки худро расонад.

Дар ҷараёни ин дидор масоили марбут ба ҳолати кунунӣ ва дурнамои рушди муносиботи Тоҷикистон ва Туркия низ баррасӣ шуданд.

Раиси ҷумҳури Қазоқистон Қосим-Жомарт Токаев бо даъвати раисҷумҳур Эмомалӣ Раҳмон ба Точикистон меояд.

Нашрияи “Спутник” аз қавли котиби матбуотии раёсати матбуотии Қазоқистон Берик Уали иттилоъ медиҳад, ки раисҷумҳури Қазоқистон Токаев рӯзҳои 19-20 май ба Тоҷикистон ташрифи расмӣ меорад ва дар рӯзномаи музокирот ба масъалаҳои амнияти минтақавӣ аҳамияти хос зоҳир карда мешавад.

Ба гуфтаи котиби матбуотии раёсати ҷумҳурии Қазоқистон масъалаҳои рушди шарики стратегии ду кишварро бо таъкид ба таҳкими ҳамкориҳои тиҷоратӣ ва иқтисодӣ,  сармоягузорӣ ва фарҳангиву гуманитарӣ дар бар мегирад.

Ба тавсиъаи ҳамкориҳои минтақавӣ, таъмини субот ва амният дар Осиёи Марказӣ диққати махсус дода мешавад.

Пештар хабар дода шуда буд, ки раисҷумҳури Тоҷикистон Эмомалӣ Раҳмон бо раиси ҷумҳури Қазоқистон гуфтугӯи телефонӣ дошт ва дар ҷараёни гуфтугӯ Эмомалӣ Раҳмон аз Токаев даъват намуд, ки моҳи май бо сафари расмӣ ба Точикистон биёяд.

Ёдовар мешавем, ки 30 апрел паз аз шуруи даргириҳо дар марз президентҳои Тоҷикистону Қирғизистон бо ҳам суҳбати телефонӣ анҷом дода, масъалаи ҳалли низои марзиро баррасӣ намуданд. Ҳамчунин аз президенти Қирғизистон Содир Ҷабборов ҳам даъват шуд, ки бо сафари расмӣ ба Душанбе ташриф биёрад.

Қарор аст дар сафари президенти Қирғизистон масъалаҳои мушкилоти марз аз ҷумла аломатгузории нуқтаҳои боқимонда баррасӣ шавад. Таърихи сафари Содир Ҷабборов  дақиқ нашудааст. Танҳо гуфта мешавад, ки муҳлати мушаххаси сафар бо роҳҳои дипломатӣ муайян мешавад.